Phŏ Thủ tướng Lê Thành Long kŭm hăm lơ kơdră chĕp kơ̆l dôm Anih tơm, anih jang păng pơlei tơm Hải Phòng vang truh pơm lêh pơih blŭng. Pơma tơ̆ lêh pơih blŭng, Kơdră Anih tơm vei lăng găh Pơtho pơhrăm Nguyễn Kim Sơn tơbăt, yak hloh 40 sơnăm pơjing păng hơtŏk tơdrong, Tơdrong pơlong tơplŏng kơdâu ăn hŏk tro jơ̆p lơ̆m teh đak ‘măng X ‘noh jĭ Tơdrong pơlong tơplŏng kơdâu ăn hŏk tro tih hloh đơ̆ng sơ̆ truh dang ei, ƀơ̆t đei hloh 20.000 ‘nu bơngai pơlong đơ̆ng 63 dêh char, pơlei tơm vang akŏm.

‘Nâu jĭ tơdrong gĭt kăl, jĭ hơnih akŏm lơ hloh đơ̆ng tơdrong jang pơhrăm hơkâu jăn ‘lơ̆ng, hơtŏk jơhngơ̆m pran đơ̆ng hŏk tro phổ thông; hơdai hăm ‘noh kŭm jing tơdrong hiôk pơting băl bu pran hloh ăn kơ dôm bơngai gơh hơgei, pran tơplŏng kơdâu lơ̆m hŏk tro jơ̆p lơ̆m teh đak.