Vă păr ang tơdrong jang tơroi tơbăt hơtŏ băl drŏ nglo hăm drŏ kăn truh sinh viên, hơdruh tơdăm kon kông, gơmăng hei (2/10), tơ̆ hnam trưng đại học Tây Nguyên, Trung ương Khŭl vei lăng drŏ kăn Việt Nam jang hơdai hăm Anih tơm vei lăng pơtho pơhrăm pơgơ̆r pơma dơnuh, roi tơƀôh pơcheh hơgei tơroi tơbăt hơtŏk ‘lơ̆ng đon hlôh vao găh hơtŏ băl đơ̆ng nglo hăm drŏ kăn ăn hơdruh tơdăm kon kông. Tơ̆ tơdrong jang, sinh viên kon kông kơ 6 hnam trưng đại học tơring Tŏk bŏk păng Tây Nguyên hlôi vang truh akŏm pơma dơnuh, tơroi dôm tơdrong pơcheh hơgei păng tơdrong jang tơroi tơbăt.

Hăm dôm trong roi tơƀôh nhen pơm kĭch, pơđơ̆k, joh hơri, pơm phim, video clip, rup yua đơ̆ng sinh viên chă pơm kơdih. Dôm ƀai pơm akŏm tơƀôh hơnăn găh hơtŏ băl đơ̆ng drŏ nglo hăm drŏ kăn lơ̆m tơdrong jang pơtho pơhrăm păng lơ̆m ŭnh hnam; lăng kăl hơtŏk ‘lơ̆ng đon hlôh vao găh hơtŏ băl đơ̆ng drŏ nglo hăm drŏ kăn, hơmet pơ ‘lơ̆ng dôm tơdrong kăl hăm drŏ kăn, hơdruh hơdăm păng hơioh.