Hăm hơnăn “Pơjing kơmăy kơmŏk pơm phim Việt Nam ƀĕnh tơdrong ‘lơ̆ng hơiă kơ hơdrĕch hơdrung, gơ̆h hơgei păng ‘lơ̆ng rŏ”, Tơdrong thi phim hơiă Việt Nam ‘măng mă 23 đei kơsô̆ phim vang thi lơ hlŏh đơ̆ng sơ̆ truh dang ei. Lơ̆m nŏh, đei 91 phim đei rơih kiơ̆ tơdrong pơgơ̆r thi, păng 56 phim đei iŏk tơmât lơ̆m tơdrong pơm phim tơƀôh tôm tơdrong.

Pơma lơ̆m jơ pơih blŭng, Phŏ Kơdră anih tơm vei lăng jŏh ayŏ kơ dŏ xoang, tơplŏng kơdâu păng chă tơmang lăng Tạ Quang Đông, Kơdră Anih pơgơ̆r thi phim Việt Nam ‘măng mă 23 pơma hơdăh, tơdrong thi phim ‘măng mă âu vă Anih pơm phim Việt Nam roi băt ăn bơngai lăng dôm phim ‘lơ̆ng hơiă găh lơ tơdrong, tơƀôh hơdăh lơ trong lăng găh tơdrong arih xa dôm bơngai pơm phim, năm truh tơdrong pơjing anih jang kơmăy pơm phim Việt Nam ƀĕnh tơdrong ‘lơ̆ng hơiă kơ hơdrĕch hơdrung, gơ̆h hơgei păng ‘lơ̆ng rŏ.