Tơdrong thi chĕh phe ‘lơ̆ng Việt Nam sơnăm ‘nâu đei 47 anih jang đơ̆ng 7 dêh char hăm 84 tơmam thi, akŏm đĭ đăng đei 157 tân. Tơ̆ vŏng thi mă hơtuch, Khul châm hơlen chă rơih đei 46 tơmam ‘lơ̆ng vă hơpăh yaih mônh, ƀar, pêng kŭm nhen chă rơih 10 tơmam chĕh phe ‘lơ̆ng sơnăm 2023. Ƀok Trịnh Đức Minh, Kơdră vei lăng khul jang chĕh phe Buôn Ma Thuột, Kơdră anih pơgơ̆r tơdrong thi ăn tơbăt: vŏng mă hơtuch pơgơ̆r đơ̆ng ‘năr 25-28/4/2023.

Hơdai hăm dôm tơdrong thi oei đei 1,2 tơdrong jang nai nhen pơdă tơmam, tĕch mơdro chĕh phe ‘lơ̆ng; ming tơƀôh tơmam vă choh jang, kơmăy kơmŏk, kơsơ̆p hla ar, tơmam vă jang chĕh phe; pơgơ̆r pha chĕh phe; ngôi pơchơt đei tơmam hơpăh. Mă loi, đơ̆ng rŏng kơ tơdrong thi Anih pơgơ̆r vă tĕch rơih kơjă hăm dôm tơmam chĕh phe ‘lơ̆ng hlŏh vă pơm lăp hăm tơdrong ‘mĕh răt yoa păng pơm hơtŏk kơjă kăp gĭt ăn chĕh phe ‘lơ̆ng đơ̆ng Việt Nam.