Tơdrong pơlong kơdâu hơvơn hloh 600 bơngai tơplŏng kơdâu jâ̆p teh đak chih măt akŏm, lơ̆m noh đei 1 ‘nu tơplŏng kơdâu bơngai Nhâ̆t. Dôm bơngai tơplŏng kơdâu lơ̆m lơ hnưr sơnăm phara băl, ‘lâ̆p hloh noh 5, 6 sơnăm păng ‘lŏ hloh noh 72 sơnăm.

Hăm 2 pơkăp hơtaih noh 5 km păng 24 km, rim bơngai pơlong kơdâu pơtơm ah 5 jơ pơgê, kơdâu rok kiơ̆ jăl trong kơphô̆ ‘nao tơ̆ km7, phương Tân An, pơlei tơm Buôn Ma Thuột. Bơngai kơdâu keh đang dôm tơchơ̆t hơtaih adoi đei pôk ăn mê đai tơbăt. Pơtôch tơdrong pơlong kơdâu, jơnŭm pơgơ̆r  hlôi pôk 20 tơmam hơpah: mă mônh, mă ƀar, mă pêng ăn dôm bơngai kơdâu drănglo, drăkăn đei jơnei kơpal hloh kiơ̆ dôm tơchơ̆t hơtaih.