VOV4.Bahnar - Pơgê năr 8/4, tơ̆ tơring Hùng Lô, pơlei tơm Việt Trì, dêh char Phú Thọ, tơring Hùng Lô pơgơ̆r pơm lêh sơng iŏk Drơ̆ng nơ̆r Pơm lê̆h joăt joe “Pơm lêh Đình Hùng Lô” ‘nŏh mŭk drăm jŏh ayŏ oei sa gĭt kăl dăr sơnăm tĕh đak păng tơbăt hơdăh tơdrong tơchơ̆t đơ̆ng dêh char Phú Thọ drơ̆ng jing hơnĭh tơmang pơ hiơ̆ jŏh ayŏ kon pơlei Hùng Lô.  Pơlei Hùng Lô sơ̆ đei hơnăn ‘nŏh Khả Lãm Trang, đơ̆ng rŏng ‘nŏh tơplĭh jing pơlei An Lão. Kiơ̆ tơdrong chă tơroi akhan, lơ̆m mĭnh năr ‘lơ̆ng rŏ Ƀok Pơtao Hùng atŭm hăm kon hơdrŭh păng rim khŭl yŏng yak năm tơ̆ tu đak kroong Lô tơmang pơ hiơ̆, chă hơngoang. Trŭh tơ̆ groi tĕh Hùng Lô, Ƀok pơtao ƀô̆h groi kông ‘lơ̆ng rŏ, tĕh rơhŭ, ‘long jing ‘lơ̆ng ƀlĭk ƀlăk kơna athei pơdơ̆h jơ̆ng. Rim koan tih păng kon pơlei ƀô̆h lơ lŏh chă pai por ‘nhot ‘lơ̆ng tơpơng ăn ƀok pơtao. Ƀok pơtao tôch chhôk hơ iă păng pơtho khan ăn kon pơlei tơ iung pơjing pơlei pơla tơ̆ au hloi. Đơ̆ng mă nŏh, kon pơlei kơ pơlei Hùng Lô pơjing Hơnih soi tơbĕh vă rơbau sơnăm sŏh hlôt nhang păng mư̆h trŭh lơ̆m năr 9 - 10/3 âm lĭch rim sơnăm ‘nŏh pơgơ̆r pơm lêh vă ƀlŏk hơdơ̆r hôn bơnê kơ Ƀok Pơtao. Kiơ̆ tơdrong joăt, pơm lêh Hơnĭh soi tơbĕh Hùng Lô đei 7 tơdrong pơgơ̆r tơm, lơ̆m au pơm lêh sơng hơvơn yang ‘nŏh mĭnh lơ̆m dôm tơdrong pơgơ̆r kăl hlŏh, pơgơ̆r tĭh hlŏh hăm kơ hrĕng ‘nu bơngai vang năm. Hrei au, lơ̆m tơring Hùng Lô oei vei kơ jăp đei 50 pơbŭng hnam ‘long so sot đơ̆ng 100 sơnăm năm tơ̆ đunh, dôm hnam oei vei răk dôm mŭk drăm, hnam nhen sơ̆ ki đĕch păng tơbăt hơdăh tơdrong joăt jang chŭn na ƀa đak. Tơdrong drơ̆ng nơ̆r Pơm lêh joăt joe “Pơm lêh Đình Hùng Lô” ‘nŏh jing mŭk drăm jŏh ayŏ oei sa gĭt kăl dăr sơnăm tĕh đak păng hơnĭh tơmang pơ hiơ̆ oei sa jŏh ayŏ kon pơlei jing tơdrong rơvơn vă kon pơlei Hùng Lô iung jang kiơ̆ tơdrong đei hơ iă, tơlĕch jang tơmang pơ hiơ̆.

Tơblơ̆ nơ̆r: Amazưt