Anih tơm Joh ayŏ Tơplŏng kơdâu păng Tơmang pơhiơ̆ duh hlôi tơlĕch tơchơ̆t găh tơdrong chih akŏm Tơdrong vei răk, hơmet akŏm păng vei răk tơƀăk mong kơjă tơdrong hơri hơxuang kră xơ̆ kơ kon pơlei kon kông, tơguăt hăm hơtŏk tơmang pơhiơ̆ jăl xơnăm 2021 – 2030. Hăm rim hơdrung kon kông, tơdrong hơri hơxuang kră xơ̆ jing tơdrong akŏm 'lơ̆ng hloh hram đei dôm kơjă joh ayŏ, hnưr erih, tơdrong juăt jue kăp gĭt.  

Kiơ̆ Anih tơm Joh ayŏ, Tơplŏng kơdâu păng Tơmang pơhiơ̆, Tơdrong jang đei tơlĕch vă xơkơ̆t găh tơdrong jang hơmet akŏm păng vei răk tơƀăk mong kơjă joh ayŏ, kơdŏ xuang kơ đe kon kông, tơguăt hăm hơtŏk tơmang pơhiơ̆. Đơ̆ng noh tơlĕch dôm trong iŏk jang, vei răk tơƀăk mong gơh đei jơnei hloh. Mă lei, vă pơm kiơ̆ dôm tơdrong âu duh gô ƀơm lơ tơdrong tơnap tap. Yă Nguyễn Thị Hải Nhung, Kơdră Anih tơm Joh ayŏ kon kông, lơ̆m Anih tơm Joh ayŏ, Tơplŏng kơdâu păng Tơmang pơhiơ̆ tơroi:  Kơyuơ tơdrong hlôh vao ưh đei hơtŏ hơnơ̆ng noh tơdrong hơvơn bơngai jang, mŭk drăm kơ jơnŭm pơgơ̆r tơring duh nhen tơring kon pơlei kon kông lơ̆m chă vei răk tơƀăk mong dôm kơjă joh ayŏ oei ƀơm lơ tơnap tap. Noh tơdrong tơrĕk đơ̆ng dôm jăl jang, dôm anih jang lơ̆m vei răk tơƀăk mong joh ayŏ juăt jue kơ dôm hơdrung kon kông, phơ phŏ tam mă tơnăp păng tam mă drơ̆ng nơ̆r păng tam mă băt hơdăh trŏ ƀlep păng tôm tong tơdrong kăp gĭt lơ̆m tơdrong jang joh ayŏ kon kông, mă hăt noh tơdrong tơroi tơbăt, hơvơn kon pơlei gơh hơnơ̆ng păng kơjăp tôm tong.

Tơ̆ dêh char Thái Nguyên, gơnơm đei jang tơnăp đơ̆ng dôm bơngai akŏm joh ayŏ tơ̆ tơring mă đe hơ-ioh iĕ bơngai Dao tơ̆ kueng Suối Bốc, xăh Yên Ninh, apŭng  Phú Lương tŏk bŏk băt hơdăh tơdrong hŏk nơ̆r pơma kon kông po, hŏk tơdra hơri Pả Dung jing trong vă hlôh vao hơdăh hloh găh tơm a hla chă hơdrung hơdrĕch kon kông po. Atŭm hăm dôm lăm pơtho tơdra hơri Pả Dung, minh lơ̆m dôm trong vei răk tơƀăk mong joh ayŏ mă bơngai Dao tơ̆ Thái Nguyên hlôi vei răk đei jơnei, noh chă pơjing kâu lak ƀô̆. 'Nâu jing dôm anih joh ayŏ kơ kon pơlei Dao băt 'mêm kơ joh ayŏ, tơdra hơri hơxuang juăt jue, tơgop pơm hơtŏk tơdrong erih đon bơnôh, pơjing tơdrong erih joh ayŏ tơ̆ tơring. Yă Phạm Thị Lan Anh, Kơdră Anih jang Joh ayŏ tơroi tơbăt apŭng Phú Lương, dêh char Thái Nguyên ăn tơbăt: Kiơ̆ đơ̆ng pơjing kâu lak ƀô̆ vei răk tơƀăk mong âu, noh nhôn tơgŭm hơmet akŏm dôm tơdra hơri hơxuang, dôm khôi xoi tơbeh kơ kon pơlei Dao. Atŭm hăm noh jing minh anih vă nhôn pơtoi pơtho hơtŏk pơih xă dôm ngê̆ nhơ̆n joh ayŏ kră xơ̆.

Đei tơ-iung pơjing đơ̆ng đunh xơ̆, pơtơm đei lơ̆m tơdrong pơm jang, lơ̆m đon lui kơ yă ƀok dơnơm, tơdra hơri Pả Dung đei kơjă joh ayŏ, đon lui păng tơdrong kăp gĭt hăm bơngai Dao. Um ai kăp gĭt kơ Pả Dung oei ăh dôm tơdrong hơri. Rim tơdrong hơri gô pơkăp kiơ̆ um ai, nơ̆r pơre kơdih, tơbang um ai đon băt phara băl. Ƀok Đặng Phúc Lương, xơ̆ jang Kơdră Jơnŭm Văn hŏk ngê̆ thươ̆t hơdrung kon kông dêh char Thái Nguyên ăn tơbăt: Dôm tơdra hơri Pả Dung kơ hơdrung bơngai Dao noh phara băl. Adrô̆ đei Dao Quý Lâm hăm Dao Đỏ noh tơjê̆ băl đĕch. Trong iŏk tơdra, tơdra kơđeh kơjung brông brŏng noh nhen lĕ phara băl. Mă lei hiôk hloh noh Pả dung duh oei jing tơdra hơri kơ bơngai Dao Đỏ.

Lơ̆m dôm xơnăm kơ âu, đei tơdrong tơgŭm đơ̆ng anih jang joh ayŏ, kon pơlei Dao tơ̆ Thái Nguyên hlôi đei trong hiôk vă akŏm tơbang dôm tơdra hơri hơxuang kră xơ̆ kơ po tơ̆ lơ tơdrong jang, tơdrong akŏm kăp gĭt kơ tơring. Tơdra hơri Pả Dung hlôi đei xơkơ̆t jing mŭk drăm joh ayŏ kăp gĭt kơ teh đak. Noh jing tơdrong ư ang, jing minh lơ̆m dôm tơdrong tơm rong 'me chăl bơngai Dao atŭm hăm vei răk tơƀăk mong lơ̆m tơpôl dôm kơjă joh ayŏ kăp gĭt, lơ̆m noh đei tơdrong hơri hơxuang kră xơ̆.

Jăh vă akhan, vei răk tơƀăk mong tơdrong hơri kră xơ̆ hăm trong tơguăt hăm hơtŏk tơmang pơhiơ̆ đei lăng jing trong jang tơnăp. Kơyuơ noh, dôm tơdra hơri kră âu gô đei erih lơ̆m hrei hla dang ei. Mă lei adrol hloh noh athei dar deh pơjing trong pơkăp jang hơdăh. Lơ̆m noh tơrĕk kăp gĭt truh tơdrong pơtho, tơgŭm ăn đe ngê̆ nhơ̆n vei răk tơƀăk mong joh ayŏ: Tơgŭm ăn đe ngê̆ nhơ̆n, bơngai đei kon pơlei lui yom lơ̆m tơpôl vang jang xơnong jang hơlâu lơ̆m dôm kâu lak ƀô̆ pơtho joh ayŏ, khôi kră xơ̆ kon kông dăh mă pơjing đei dôm kơjă joh ayŏ kăp gĭt 'nao vă pơm jang ăn kon pơlei păng dôm hơdrung bơngai kon kông tơguăt hăm tơmang pơhiơ̆ păng hơtŏk tơdrong đei yua găh joha yŏ ăn kon pơlei kon kông.