Pơmâu ja lăp đei 1 ‘măng lơ̆m sơnăm lơ̆m pơyan ‘mi, pơmâu chăt tơ̆ teh rơ bưi, jê̆ tơpu moa teh. Pơmâu ja đa chăt lơ hloh lơ̆m khei 6 truh khei 8 lơ̆m sơnăm. Kiơ̆ hlôh vao đơ̆ng bơngai Êđê, vă lăng băt đei pơmâu ja sa gơh dăh ưh ‘noh athei lăng jum dăr hơnih pơmâu chăt đei tơpu moa teh dăh ưh. Mă 2 ‘noh jĭ lăng lơ̆m tơm pơmâu bơ nhrôch, kok hyơ hyơr. Rơ nôp pơmâu oei iĕ kơ mâu teh, mưh tih ‘noh tơplih jing kơ mâu kok, tơlang nhen hla du.

Yă H’Rŏk Êban (Aduôn Lia) oei tơ̆ plei Hŭk, xăh Čư̆ M’Gar, apŭng Čư̆ M’Gar, dêh char Dak Lak tơbăt, bơngai Êđê  tơchĕng akhan dôm bơngai đei ai pŭn, arih iơ̆m dim mưh năm tơ̆ ‘bri mă tơƀơ̆p đei pơmâu ja. Kon pơlei ling lang băt iŏk yua dôm tơmam sa đơ̆ng bri brăh, lơ̆m noh đei pơmâu ja ‘noh jĭ 1 tơmam sa đei lơ kơchơ̆t bek ‘lơ̆ng ăn ŭnh hnam.“Bơngai Êđê băt kơ sa pơmâu ja đơ̆ng sơ̆ bơ̆ih. Ĭnh kră bơ̆ih ‘noh lăng băt đei pơmâu hơ yơ gơh sa, pơmâu hơ yơ pơmâu pơnhŭl. Gơh pai hăm ‘nhot hla tre. Tơmam sa âu bơngai Êđê đa pai hăm ƀoh, ƀôt ngot, hơ mrĕ. Sơ̆ pơyan ‘nâu ưh kăl năm răt ‘nhot tơ̆ hơnih tĕch mơdro, pơmâu đei lơ lơ̆m mir lơ̆m roh.”

 Pơmâu ja đa chăt tơ̆ dôm groi, lơ̆m pơgar cheh phe, kơ su... mă lei yua kơ sư đei kơ chơ̆t bek ‘lơ̆ng, ‘ngam kơ na lơ bơngai đa tơchă. ‘Nhŏng  Y Zuem Mlô, oei tơ̆ plei Sưk, xăh Ea Đar, apŭng Ea Kar, dêh char Dak Lak tơbăt, dôm sơnăm tơ jê̆ âu, tôch kơ mơmat tơchă đei pơmâu ja, 1 păh yua đơ̆ng cham char bri brăh ưh pă ‘lơ̆ng, ƀơ̆t mă bơngai tơchă pơmâu ja roi ‘năr roi lơ. Lăp bu pŭn ai mă ƀôh đei pơmâu ja. Pơmâu ja mưh rô̆ đang athei pai hloi, lê̆ đunh gô ưh kơ ‘lơ̆ng. ‘Nhŏng Y Zuem Mlô tơroi: “Lơ̆m pơyan ‘mi, mưh bơ̆n năm tơ̆ mir, năm tơ̆ bri gô tơƀơ̆p pơmâu ja. Đơ̆ng rŏng kơ ôp rơgoh, gơh pai ‘nhot dăh mă sao. Mưh pai ‘nhot rơ̆ đak blôk đang kơ ‘noh tăh pơmâu, teh ƀoh ngot, hơ mrĕ, ĕch, dăh mă hla lôt, ‘nhot bâu phu. Tơmam sa pơm pai đơ̆ng pơmâu ja sŏng hăm por dăh mă pai chao kŭm tôch kơ ‘lơ̆ng, mưh chao sĭn tăh thim hla kat dăh mă ĕch. dăh mă bơ̆n ƀuh đang kơ ‘noh chơ̆m hăm đak măm, tŭl hăm ƀum kơ dĭm, tơ ‘ngum lơ̆m hla prit, tôch kơ ‘lơ̆ng”.

lơ̆m tơmam sa kơ bơngai Êđê, pơmâu ja oei đei pai hăm pro har. Mưh pai tơmam sa đơ̆ng pơmâu ưh kơ gơh tăh lơ ƀoh ngot vă vei đei tơdrong ‘ngam păng ƀâu phu đơ̆ng pơmâu. Pơmâu ja bônh kơ pơm, ƀônh kơ pai.Kon pơlei kŭm đa sao hơdai hăm tơ yĕn vă kơ ‘ngam, ƀâu phu, rơ muăn,... pơm jing tơmam sa tôch kơ ‘lơ̆ng.

Hăm tơdrong bâu phu păng đei kơ chơ̆t bek ‘lơ̆ng ăn jơhngơ̆m jăn, lơ bơngai mơdro joăt kơ tĕch mơ dro tơmam ‘lơ̆ng Dak Lak đa tơchă răt hăm kơ jă hloh 500.000 klak jên 1 kĭ. Mưh ‘mi ƀơ ƀreh hơdai hăm kial tơ hlu hơ hĕo tơ̆ groi kông teh gôh, kŭm jing tơƀôh ăn pơyan pơmâu ja đĭ truh, dôm bơngai pŭn ai gô sơng iŏk tơmam đơ̆ng bri brăh âu.