Kiơ̆ hơlen đơ̆ng Hơnih chĕp pơgơ̆r tơ̆ Pơm lêh pơtôch, năr lêh hlôi tơgop atŏk kơtang tơgoăt tơgoăl hơdrĕch hơdrung; pôk pơ ư, atŏk kơtang lang să tơdrong ‘lơ̆ng rŏ oei sa joăt joe sơ̆ ki kơ rim hơdrung tơring Tây Nguyên pơma hơdrô̆ păng tơdrong oei sa ‘lơ̆ng rŏ joăt joe sơ̆ ki kơ 54 hơdrung Việt Nam pơma atŭm.

Lơ̆m lêh pơtôch-Hơlen pơtôch năr lêh, Hơnih chĕp pơgơ̆r hlôi tơbăt hơdăh, pôk ăn lơ hơnăn, tơmam hơpăh ăn rim nghê̆ nhân păng khul jŏh asoang kon pơlei iŏk đei jơnei kơtang. Lăp đơ̆ng rŏng pơm lêh păng pôk ăn tơmam hơpăh, hloh 600 ‘nu nghê̆ nhân, bơngai joh hơri kon pơlei păng rim kơdră tang măt hlôi vang chă hơsoang pơkă tơƀơ̆p dih băl tơ̆ Năr Lêh Joh ayŏ kơdŏ soang, Đă ƀŏng lŏng tơplŏng kơdau păng Tơmang pơhiơ̆ rim hơdrung tơring Tây Nguyên ‘măng mă II lơ̆m sơnăm 2026 gô đei pơgơ̆r tơ̆ dêh char Lâm Đồng.