Tơdrong pơlong rapor pơre nơ̆r jơ̆p teh đak ‘măng mă 16 sơnăm 2024 ưh hơdrô̆ jĭ Năr akŏm kơ dôm bơngai jang rapor pơre nơ̆r mă oei jing jơ năr kơ dôm tơring lơ̆m jơ̆p teh đak akŏm hơmet ăn tơdrong Hop akŏm Đảng dôm jăl, pơkăp truh Hop akŏm jơ̆p teh đak ‘măng mă 14 kơ Đảng păng sơkơ̆t tơbăt 100 sơnăm ƀăo chĭ Kăch mang Việt Nam.

Hăm hơnăn “Rapor pơre nơ̆r Việt Nam – lơ trong jang lơ̆m tơplih kơsô̆”, Pơlong rapor pơre nơ̆r jơ̆p teh đak ‘măng mă 16 sơnăm 2024 sơkơ̆t, tơplih kơsô̆ lơ̆m ƀăo chĭ pơma hơtŭm păng rapor pơre nơ̆r pơma hơdrô̆ ưh hơdrô̆ tơplih gah kơmăi kơmŏk gah trong pơm jang, mă kăp gĭt hloh noh jing tơplih gah đon tơchĕng, đơ̆ng jăl pơgơ̆r, truh tơ̆ dôm tơdrong chih akŏm tơlĕch ƀăo chĭ. ‘Nâu jing trong jang hơtŏk kăp gĭt truh tơdrong hơtŏk tơ-iung kơ rim anih jang ƀăo chĭ pơma atŭm păng rapor pơre nơ̆r pơma hơdrô̆ lơ̆m chăl ‘nao hrei âu.