Kiơ̆ kơ ‘noh, Năr kơsơ̆p hla bơar păng tơdrong joăt đŏk hla bơar tơ̆ dêh char Dak Nông đei pơgơ̆r lơ̆m dêh char, vă jang kiơ̆ Năr kơsơ̆p hla bơar păng tơdrong joăt đŏk hla bơar Việt Nam 21/4, kơkuh chơt hơ iă tơbăt 20 sơnăm pơjing dơ̆ng dêh char Dak Nông (01/01), tơbăt 49 sơnăm Năr rơngei Gia Nghĩa - Đak Nông (23/3).

Tơ̆ pơlei tơm Gia Nghĩa, đơ̆ng năr 13 - 15/3, Năr lêh kơsơ̆p hla bơar gô đei pơgơ̆r 10 tơdrong, mă kăl ‘noh pơdă tơbôh hloh 15.000 kơsơ̆p hla bơar păng rim hla bơar chih tơdrong jŏh ayŏ; pơdă tơbăt rim kmăi kmŏk tơgŭm ăn atŏk tơ iung tơdrong joăt chă đŏk, tơplih kơsô̆ tơgŭm ăn tơdrong pơtho pơhrăm, tơplih kơsô̆ lơ̆m tơdrong jang hơnih mong răk; pơma dơnuh hăm bơngai chih pơcheh; pơma dơnuh dih băl lơ̆m khul joh ayŏ kơdŏ soang păng pơlong khul hơsoang tuih chăl hle kơ rim hnam trương pơtho pơhrăm. Kiơ̆ đơ̆ng ƀok Hoàng Mạnh Thắng, Kơ iĕng Kơdră Hơnih vei lăng Kơtơ̆ng ang păng Pơre nơ̆r dêh char Dak Nông, hăm tơdrong vang tơgŭm djru đơ̆ng 22 hơnih jang, Năr kơsơ̆p hla bơar păng tơdrong joăt đŏk hla bơar sơnăm au gô tơpă jing năr lêh tơ̆ tơring.