VOV4.Bahnar - Lơ̆m 2 năr (20-21/7), tơ̆ pơ lei tơm Buôn Ma Thuột, dêh char Dak Lak pơ gơ̆r tơ drong joh ayŏ hơ ioh kơ dôm hơ drĕch kon kông tơ ring tŏk bŏk - Tây Nguyên. Vang truh akŏm đei 200 ‘nu bơ ngai tang măt ‘noh hơ ioh kon kông hơ gei tơ̆ dôm dêh char Dak Lak, Đà Nẵng, Lâm Đồng, Kon Tum, Dak Nông, Gia Lai.

Hơ ioh hơ gei đei iŏk hŏk ƀŏng Vừ A Dính

Đe oh ưh khan lăp hŏk hơ gei mă oei jing dôm bơ ngai vei lăng lăm tơ năp, vei lăng khŭl hơ gei, hơ nơ̆ng tơ gŭm bôl buăl vang hơ drin. Tơ̆ tơ drong jang, dôm bơ ngai tang măt đei vang akŏm gơ măng ŭnh kơ trăi păng lăng hơ ri hơ soang ‘lơ̆ng hơ iă kon kông yua đơ̆ng dôm khŭl vang akŏm hơ ri hơ soang; vang tơ ƀơ̆p pơ ma dơ nuh, chă hơ len lăng dôm tơ drong joh ayŏ ‘lơ̆ng hơ iă kiơ̆ tơ ring...

Đe oh đei chă hơ len lăng găh tơ drong oei sa ‘lơ̆ng hơ iă kơ dôm hơ drĕch kon kông

‘Măng âu, Trung ương Đoàn hơ druh tơ dăm Cộng sản Hồ Chí Minh ‘măn asong cham đă ƀŏng lŏng tơ plŏng kơ dâu tơ pôl đei kơ jă 150 triệu hlak jên păng hnam Che văn ƀrê đei kơ jă 80 triệu hlak jên ăn dêh char Dak Lak. Anih mong jên hŏk ƀŏng Vừ A Dính ‘măn asong 50 kơ suơ̆t hŏk ƀŏng đei kơ jă 50 triệu hlak jên ăn kơ 50 ‘nu hơ ioh kon kông tơ ring tŏk bŏk - Tây Nguyên.

Thuem: Tơ blơ̆