Vă hơmet ăn tơdrong pơlong, đơ̆ng hơdrol kơ noh minh ƀar giĕng, rim khul ngê̆ nhơ̆n tơ̆ rim pơlei pơla hlôi hăt hot pơhrăm dôm ƀai chêng juăt jue dah mă pơhrăm pơdreh hơtŏk, pơm ‘nao ƀai chêng. Pơmai H’Nhuen Mlô, tơ̆ pơlei Kŏ Siêr, phương Tân Lập, pơlei tơm Buôn Ma Thuột, dêh char Đak Lăk ăn tơbăt, pơmai păng rim bơngai lơ̆m khul chĭng chêng drăkăn phương Tân Lập hlôi pơhrăm lơ̆m minh khei kơ âu vă gơh pơdreh kloh klĕch 2 ƀai chêng kong, chêng kram atŭm hăm tơdra hơxuang: “Hơdrol kơ thâi pơtho noh nhôn chă pơhrăm kơdih, chă pơkăp khul dih băl. Ah thâi truh pơtho noh akŏm lơ̆m dôm tơdrong tam mă trŏ, tam mă ‘lơ̆ng đĕch. Hơnơ̆ng thoi noh nhôn pơhrăm rŏng ‘ngir truh ah kloh klĕch bơih pơtơm pơdơh. Đe pơmai oh năm pơdreh chĭng chêng noh adoi sô̆ lơ̆m đon, bu bu adoi kơ-‘nôh dơh po vă gơh pơdreh chĭng chêng hơgei hloh”.

Sơnăm âu jing sơnăm mă 3 pơlong joh ayŏ chĭng chêng dêh char Đak Lăk pơgơ̆r. Atŭm hăm pơdreh chĭng chêng păng brŏ kon kông, lơ̆m tơdrong pơlong oei đei pơlong hơri brông, hơxuang, hơri hơ-‘mon, akŏm khôi juăt joh ayŏ tơguăt hăm chĭng chêng Tây Nguyên. ‘Nâu jing ‘măng vă rim anih jang chă hŏk hơlen, tơroi gah tơdrong hlôh vao, atŭm hăm noh tơbang tơdrong gơh hơgei, hơtŏk dôm tơdra hơri păng brŏ kon kông. Ngê̆ nhơ̆n Y Phúc Êban, tơ̆ pơlei Ju, xah Ea Tu, pơlei tơm Buôn Ma Thuột, dêh char Đak Lăk tơroi: “Brư̆ brư̆ hŏk hơlen đei tŏ sĕt, vă roi năr roi akŏm đei tơdrong hơgei hloh. Tơdrong pơlong jing ‘măng vă pơlong, pơjing tơdrong lăp ah pơlong noh đon lăp nhan kơ khul roi đei hơtŏk hloh dơ̆ng”.

Tơdrong pơlong sơnăm âu hơvơn đei hloh 500 ngê̆ nhơ̆n, bơngai joh ayŏ kon pơlei kơ 13 apŭng, thĭ xah, hnam trưng Đăi hŏk Tây Nguyên păng minh ƀar hnam trưng THPT Kon kông hŏk oei hadoi lơ̆m dêh char vang akŏm. Rim anih jang adoi pơtruh dôm tơdrong pơdah kăp gĭt đei tơdrong vang akŏm đơ̆ng đe ngê̆ nhơ̆n hăm lơ hnưr sơnăm phara băl, pơdah tôm khôi juăt kră sơ̆, tơdrong akŏm et xa kơ minh hơdrung bơngai, minh tơring. Pơmai H’Lâm HMok, tơ̆ thĭ trâ̆n Buôn Trấp, apŭng  Krông Ana tơroi: “Nhôn chơt hơ-iă đei truh tơ̆ âu vă akŏm hŏk hơlen atŭm hăm khul đe boăl gah trong pơdreh chĭng chêng păng gơh chă hơ̆k hơlen lơ hloh tơdrong hlôh vao đơ̆ng khul boăl tơ̆ dôm pơlei pơla nai truh akŏm pơlong”.

Kiơ̆ đơ̆ng 3 ‘măng pơgơ̆r, tơdrong pơlong joh ayŏ chĭng chêng hlôi đei lơ tơplih. Lơ̆m noh, tơdrong pơkăp hăm khei năr hơdah đei pơtơm đơ̆ng hrôih noh dôm khul gơh đei lơ jơ ‘năr vă pơhrăm, rơih dôm ƀai chêng ‘lơ̆ng vă năm pơdah. Nhen tơ̆ pơlei tơm Buôn Ma Thuột, Anih jang Tơroi tơbăt, Joh ayŏ păng Tơplŏng kơdâu pơlei tơm hlôi pơgơ̆r Pơlong Joh ayŏ tơpôl vă rơih dôm khul ngê̆ nhơ̆n păng tơdrong pơlong ‘lơ̆ng hơgei hloh vă năm pơlong tơ̆ dêh char. Yă Phạm Thị Hải Bình, Phŏ kơdră Anih jang ăn tơbăt: “Dôm tơdrong pơdah đei jơnei lơ̆m ‘măng pơlong Joh ayŏ tơpôl gô vang năm Pơlong joh ayŏ chĭng chêng kơyuơ dêh char Đak Lăk pơgơ̆r. Păng nhôn kơchĕng gô pơgơ̆r kơmăng akŏm joh ayŏ vă sơng kơkuh tơbăt 120 sơnăm năr tơ-iung pơjing dêh char Đak Lăk, 120 sơnăm Buôn Ma Thuột đei tơ-iung pơjing păng hơtŏk, tơbăt 80 sơnăm năr tơ-iung pơjing Khul linh kon pơlei Việt Nam, lơ̆m tơdrong akŏm sơng tơbăt 120 sơnăm tơ-iung pơjing dêh char”.

Kiơ̆ kơ ƀok Lại Đức Đại, Phŏ Kơdră Anih jang Joh ayŏ, Tơplŏng kơdâu păng Tơmang pơhiơ̆ Đak Lăk, anih ‘nao kơ tơdrong Pơlong sơnăm âu noh jing tơdrong pơih să anih pơgơ̆r. Tơplih kơ pơgơ̆r akŏm tơ̆ Anih Joh ayŏ dêh char noh dôm khul asong pơdah pơlong tơ̆ 2 pơlei hơtŏk pran gah tơmang pơhiơ̆. Kiơ̆ đơ̆ng noh, pơjing rah tơmam tơmang pơhiơ̆ ăn tơmoi chă tơmang lăng ah Lêh Kuôk khanh, atŭm hăm noh tơgŭm ăn tơdrong pơd.0ah kơ dôm khul pơdreh chĭng chêng gơh pơih să hloh: “Sơnăm âu pơgơ̆r tơ̆ 2 anih tơmang pơhiơ̆ mă lơ̆m lêh năr 2/9 đei lơ tơmoi truh, noh Pơlei tơmang pơhiơ̆ Akŏ Dhông păng tơring tơmang pơhiơ̆ pơlei Kŏ Tam. Tơdrong pơlong ưh hơdrô̆ jing ‘măng vă chă hŏk hơlen tơdrong hlôh vao dih băl, tơbang tơdrong hơgei, tơdrong ‘meh vă pơdjoi dôm kơjă juăt jue kơ joh ayŏ chĭng chêng mă oei jing ‘măng vă dêh char Đak Lăk tơbang gah joh ayŏ chĭng chêng truh hăm kon pơlei păng tơmoi lơ̆m păng ‘nguaih kơ teh đak”.

Vă jê̆ 30 tơdrong pơdah kơyuơ dôm khul pơdreh chă pơdah, hăm lơ tơdrong joh ayŏ kăp gĭt, tơdrong pơlong hlôi tơgop pơ-ư pơ-ang gah kơjă joh ayŏ ‘lơ̆ng rŏ kơ dôm hơdrung kon kông tŏk bŏk oei hơrih jang xa tơ̆ Đak Lăk. Atŭm hăm noh, tơgop tơbang joh ayŏ, tơmang pơhiơ̆ kơ dêh char truh hăm kon pơlei păng tơmoi, pơjing cham char hŏk hơlen tơmang lăng lơ̆m dôm năr pơdơh lêh Kuôk khanh tơ̆ tơring lơ̆m sơnăm âu.