VOV4.Bahnar - Hăm nơ̆r pơ ma “ Yua kơ 1 Đông Nam Á pran kơ tang hloh” lêh pơ gơ̆r blŭng a SEA Games 31 vă pơ gơ̆r lơ̆m 8 jơ gơ măng kơnh (12/5) tơ̆ cham đă ƀŏng lŏng kơ teh đak Mỹ Đình hăm hơ năn “ Athei rang hơ dăh - Let’s shine (kŭm jing hơ năn ƀai hơ ri kơ SEA Games 31) jĭ hơ pơi ‘meh tơ ƀôh jơ hngơ̆m pran lơ̆m tơ drong lei lăi păng pha ra băl đơ̆ng tơ drong joh ayŏ kơ dôm teh đak Đông Nam Á; krao hơ vơn tơ drong tơ goăt tơ goăl, vang tơ gŭm vă pơm đei 1 tơ pôl kơ jăp lơ̆m khei ‘năr apŭng plĕnh teh tŏk bŏk dơ̆ng tơ̆ hơ năp dôm tơ drong tơ plih păng ‘long nol tih tên.

Tơ drong jang pơ gơ̆r blŭng a gô pơ gơ̆r hăm lêh nơ năm pơ rŏ, lêh hơ tŏk hla kơ Việt Nam păng hơ ri Quốc ca, dui hơ tŏk hla ar Đông Nam Á păng SEA Games 31. Đơ̆ng rŏng kơ lêh pơ gơ̆r blŭng a, 11 ‘nu bơ ngai  pơ long gô iŏk tơ hnit păng tơ̆k hơ dăh hơ nih tơ hnit SEA Games 31.

Lêh pơ gơ̆r blŭng a gô tơ gop tơ ƀôh dôm um rup ‘lơ̆ng hloh găh 1 Việt Nam hơ iă, rơ hâu, ‘mêm kơ tơ moi, kŭm hăm dôm teh đak ASEAN nai vang ang hơ dăh, pran kơ tang hloh đơ̆ng rŏng kơ jĭ hơ buh COVID-19 ‘moi kiơ̆ 3 tơ drong tơ ƀôh. Tơ drong 1: “Việt Nam rơ hâu hiôk”. Tơ drong 2: “Đông Nam Á pran kơ tang”. Tơ drong 3: “Đông Nam Á ang hơ dăh”.

Thuem: Tơ blơ̆