Pơmai Ka Bông (K’Ho Sre) tơ̆ thôn Phú Bình, xăh Phú Hội, apŭng Đức Trọng, dêh char Lâm Đồng đei 2 ‘nu kon. Pơmai pơngơ̆t kơ đon kơlih hli ning mônh kơnh kon hơ-ioh po gô hiơt hiong nơ̆r pơma mĕ ƀă rơneh, pơmai hơpơi ‘meh 2 ‘nu kon pơmai athei gơh đŏk, gơh chih chư K’Ho po. Pơmai Ka Bông tơroi:  “Hrei âu mạng tơpôl hơtŏk pran, kơyươ noh nơ̆r K’Ho nhôn pă gan đei lơ bơngai mơ̆ng bơih... Inh hơpơi ‘moih 2 ‘nu kon inh athei vei răk tơm a hla chă yă ƀok dơnơm po noh gơh đŏk pơre, băt chih chư kơ nơ̆r mĕ ƀă rơneh po”

Oh Lơ Mu Nay Sa (K’Ho Cil, rơneh xơnăm 2002), tơ̆ thôn Srê Đăng, xăh N’Thôl Hạ, apŭng Đức Trọng, dêh char Lâm Đồng dang ei noh sinh viên xơnăm mă 3, Khua Yăo yŭk Tiểu hŏk, Hnam trưng Đăi hŏk Tây Nguyên ăn tơbăt, tơ̆ pơlei pơla oh dang ei pă đei pơdreh chĭng chêng hơgơ̆r păng hơri tơdra kră xơ̆ lơ̆m dôm ‘măng akŏm et xa. Phŏ rim bơngai lơ̆m unh hnam pơma nơ̆r Yuăn vă pơma dơnuh dih băl. Hơbăn ao tanh juăt jue kon kông po hŭi kơ ƀôh hrŭk hrơ̆p. Ăh mă oh oei ‘lâ̆p noh oei tơmơ̆ng yă tòng bơr, pơdreh chĭng chên... ăh ‘lŏ ƀiơ̆ noh, yă lôch hiong noh adoi chĕp ba pơđĭ păng dôm um ai noh oei lơ̆m kơ̆l ‘ngok đĕch. Oh Lơ Mu Nay Sa mơn ƀuah kơdih: “Oh ‘meh vă lơ̆m dôm tơdrong akŏm et xa, đe kră pơlei, kơdră pơlei, dôm bơngai hlôh vao găh juăt jue kon kông po pơtho ăn kơ nhôn, vă nhôn đei akŏm hŏk hơlen pơdjoi joh ayŏ ‘lơ̆ng rŏ noh kơ kon kông po. Duh nhen ning mônh kơnh inh gô pơtoi pơtho ăn đe hơ-ioh kon kông po, vă ưh lai yơ hiơt hiong lê̆ đĭ”

Vă chĕp vei jơhngơ̆m pran tơguăt tơguăl tôm kon pơlei, dêh char Lâm Đồng hlôi hơtŏk pran tơroi tơbăt găh kơjă joh ayŏ kon kông, hơtŏk tơdrong pơ-ư pơ-ang găh kơjă joh ayŏ; hơlêm pơtrrŭt yua dôm tơdra hơrin kon kông, tơdra hơxuang kră xơ̆, tơdra kon kông... Dêh char adoi axong hơmet pơtrŏ lơ khôi juăt jue nhen Et Pơthi kơ bơngai K’Ho tơ̆ K’Long, apŭng Đức Trọng, Et Nhô Wèr kơ bơngai K’Ho Sre tơ̆ apŭng Di Linh, Et Nhô Rơhe (Tăh ƀa lơ̆m xum) kơ bơngai K’Ho Sre, apŭng Lâm Hà, Et pơkong kơ bơngai K’Ho Cil tơ̆ xăh Đạ Chais apŭng Lạc Dương,…

Oh Ka Tảo, (K’Ho Sre, rơneh xơnăm 1998), dang ei noh sinh viên xơnăm mă anô̆ đĭ đăng Khua Xet ngĭm, Hnam trưng Đăi hŏk Tây Nguyên ăn tơbăt: tơ̆ pơlei pơla oh, thôn Kon Pàng, xăh Tân Thanh, apŭng Lâm Hà, dêh char Lâm Đồng, kon pơlei adoi oei răk vei tơnăp um ai joh ayŏ kon kông po, chĭng chêng păng dôm tơdrong et xa juăt jue kon kông hơnơ̆ng đei vei răk tơƀăk mong, gơnơm đơ̆ng noh oh nhen đei chruih pơhram đak toh rơngơp lơ̆m đon bơnôh mă hlôi đei đơ̆ng klak klơm mĕ pơjing. Oh Ka Tảo chơt hơ-iă ăn tơbăt: “Tơ̆ pơlei pơla inh, kon pơlei adoi oei pơdjoi tơdrong pơdreh chĭng chêng, hơri tơdra kră, ăn đe hơdruh tơdăm lơ̆m pơlei hŏk hơlen. Lơ̆m dôm tơdrong et xa pơkong, et thơ thâu xơnăm erih... tơ̆ âu đe hơdruh tơdăm đei pơhrrăm pơdreh chĭng chêng, inh ƀôh tơnăp tơpă ƀơ̆t đang măt đei ƀôh tơdrong âu tơ̆ pơlei pơla inh”

Sinh viên Ka Tảo hơpơi ‘moih joh ayŏ kon kông po đei tơbang lơ̆m dôm tơdrong tơroi tơbăt lơ hloh vă đei boăl mơlôh băt truh. Oh Ka Tảo tơroi:  “Oh ‘meh vă đe boăl mơlôh hrei âu hơri lơ tơdrong hơri kră nơ̆r ‘nao, joh hơxuang, dôm tơdrong akŏm joh ayŏ kon kông đei rapor lơ̆m Rađiô, pơdăh ti vi vă đei lơ bơngai băt truh joh ayŏ kon kông po”

Tơdrong jang vei răk chư chih nơ̆r pơma kon kông adoi đei dôm jăl pơgơ̆r tơring tơ̆ Lâm Đồng tơnăng kăl. Rim tơring adoi tơmơ̆t lơ̆m pơkăp pơtho nơ̆r pơma chư chih kon kông ăn đe hŏk tro  K’Ho pơma adrô̆, đe kon kông pơma atŭm tơ̆ dôm tơring đei kon pơlei kon kông erih jang xa păng pơtho nơ̆r pơma chư chih kon kông tơ̆ hnam trưng kon kông hŏk oei hadoi.

Hrei âu, vă băt hơdăh tơ̆ dôm pơlei pơla K’Ho pơma atŭm, pơlei pơla Tây Nguyên pơma adrô̆, hlôi đei đe boăl mơlôh hŏk kơjung ‘meh vă đei pơdjoi tơdrong juăt jue kon kông po. Tơdrong tơgăl kơ pôk bơnê hăm đe boăl mơlôh âu noh jing tơdrong hlôh vao trŏ găh kơjă joh ayŏ. Vă yak hadoi hăm đe boăl mơlôh K’Ho pơma adrô̆, bơngai kon kông tơ̆ tơring teh Lâm Đồng pơma atŭm, dôm jăl jang kơpal pơih dôm lăm pơhrrăm hơri tơdra kră xơ̆, pơhrrăm pơdreh chĭng chêng, pơih lăm hŏk chư kon kông ăn đe hơ-ioh tơ̆ tơring đei kon pơlei kon kông erih jang xa adoi nhen tơ̆ dôm hnam trưng kon kông hŏk oei hadoi. Đơ̆ng noh tơgop vei răk tơƀăk mong kơjă joh ayŏ juăt jue kơ bơngai kon kông.