Dôm tơdrong akŏm pơchơt tơ̆ lêh apinh sơnêp nơnua pơyan hla ruih pă đei lơ, mă akŏm ăn tơdrong tơgŭm kon pơlei hơmet răm đơ̆ng ‘mi kial đak hơbông pơrăm. Soi apinh sơnêp sơnua pơyan hla ruih jing minh khôi joh ayŏ juăt jue đei pơgơ̆r ah khei Trung thu rim sơnăm tơ̆ anih soi ƀlŏk Lạc Giao, anih soi ƀlŏk kơ Ƀok Kơdră pơtơm tơring teh oei xa Đào Duy Từ păng rim bơngai hlôi akŏm jơhngơ̆m pơjing pơlei Lạc Giao – pơlei mă blŭng kơ bơngai Việt tơ̆ tơring teh Đak Lăk.

Soi apinh đei pơgơ̆r kăp gĭt grasia kơyuơ khul soi tơbeh đei đe kră ‘lŏ sơnăm, bơngai đei kon pơlei lui yom lơ̆m pơlei pơgơ̆r. Soi apinh sơnêp sơnua jing khôi vă bơnê kơ plenh teh, bơnê kơ dôm bơngai hlôi akŏm pơjing pơlei pơla, rim bơngai hlôi tơgŭm asong ăn ‘mi kial sơđơ̆ng, kon pơlei teh đak sơnêp sơnua, jang xa đei yua lơ. Lơ̆m ƀai pơđơ̆k soi plang sơnăm âu đei minh tơdrong apinh vă kơ đak hơbông dah tenh och, kon pơlei đei tơdrong hơrih sơđơ̆ng ‘lơ̆ng.