Pơgê 10/3, tơ̆ xăh Trường Hà, apŭng Hà Quảng, dêh char Cao Bằng pơm lêh sŏ tŏng iŏk đak tơ̆ thong Lê Nin, pơtơm pơih pơgơ̆r năr pơchơt vih truh hăm anih tơm a Pác Bó sơnăm 2024. Ƀlep ƀât ‘măng mă âu, dêh char Cao Bằng sơng iŏk tơdrong tơchơ̆t chih tơbăt Tơmam jŏh ayŏ kăp gĭt kơ teh đak hăm tơdrong “Tanh brai đơ̆ng bơngai Tày”. Hơdai hăm ‘nŏh, hơgơp Ngườm Gảng păng Hnam soi Nùng Trí Cao kŭm đei chih tơmât lơ̆m anih gru groa kăp gĭt kăl dêh char.

Tơdrong lêh sŏ iŏk đak đơ̆ng tu đak Pác Bó păng sơng đak ưh lăp tơƀôh tơdrong juăt ‘lơ̆ng đơ̆ng nhă đak ƀlŏk kơtu kơ hơdrĕch hơdrung bơ̆n đĕch mă oei jing tơdrong juăt tôch hơiă tơ̆ tơring hai. Tơdrong lêh pơih blŭng ăn Năr lêh vih dơ̆ng tơ̆ tơring tơm a Pác Bó sơnăm 2024. Tơ̆ tơdrong lêh oei đei tơdrong thi rơmo pơyan Puih mak; thi Kơdâu  “Vih tơ̆ Pác Bó” sơnăm 2024; pơgơ̆r roi tơbăt dôm tơdrong jŏh ayŏ kơ dŏ xoang, tơmam xa đơ̆ng dôm xăh, thĭ trơ̆n; ming pơdă um rup tơdrong juăt ‘lơ̆ng đơ̆ng bơngai Nùng Vẻn.