VOV4.Bahnar - Năr 14/4, Dơnŏ anĭh vei lăng kon pơlei dêh char Kon Tum jang hơdoi hăm Hnam trương Đăi hŏk Đà Nẵng tơ̆ Kon Tum păng Khŭl Tơgoăt tơgoăl Việt Nam- Lào-Campuchia dêh char pơgơ̆r Têt joăt joe Bunpimay păng Chol Chnam Thmay ăn rim đe ŏh hŏk tro bơngai Lào păng Campuchia tŏk bŏk hok pơhrăm tơ̆ dêh char au.

Pơgơ̆r soi tơbĕh sơng sơnăm ‘nao Têt joăt joe Chol Chnam Thmay kơ Campuchia

Lơ̆m tơdrong pơgơ̆r, rim kơdră tang măt păng rim đe ŏh hŏk tro hlôi pơgơ̆r pơm kiơ̆ tơdrong joăt chô̆ brai tơ̆ kơkŏng lơ̆m năr Têt joăt joe Bunpimay kơ Lào păng soi tơbĕh Sơng sơnăm ‘nao Têt joăt joe Chol Chnam Thmay kơ Campuchia, vang chă asoang tơdra Lăm Vông,… Jơ ‘năr au, Dơnŏ anĭh vei lăng kon pơlei dêh char Kon Tum, Hnam trương Đăi hŏk Đà Nẵng tơ̆ Kon Tum hlôi pôk tơmam drăm păng hmach chơt hơ iă hlŏh hăm rim hŏk tro ƀlep lơ̆m năr Têt joăt joe. Đei băt, hrei au đei hlŏh 160 ‘nu sinh viên Lào păng 17 ‘nu sinh viên Camuchia tŏk bŏk hŏk pơhrăm tơ̆ Hnam trương Đăi hŏk Đà Nẵng tơ̆ Kon Tum.

Tơblơ̆ nơ̆r: Amazưt