VOV4.Bahnar - Truh hăm tơ mam sa kơ bơ ngai Êđê ‘ngoăh kơ dôm tơ mam ‘lơ̆ng đơ̆ng dôm kơ loăi ‘nhot bri oei đei dôm tơ am sa ‘lơ̆ng đơ̆ng pơ kao bri, nhen pơ kao tơ neh, pơ kao núc nác, yŏl... Bơ ngai Êđê yua pơ kao pơm tơ mam sa păng pơm pai jing dôm tơ mam sa ‘lơ̆ng, ƀai pơ gang hơ met jĭ tôch kơ đei yua. Lơ̆m noh athei tơ roi truh tơ mam sa ‘lơ̆ng hơ iă đơ̆ng pơ kao kơ mưt bri.

Lơ̆m dang khei 4, khei 5 ‘noh pơ yan pơ kao kơ mưt bri pơ jei băl bluh pơ kao. Bơ ngai Êđê ‘noh pơ tơm băl pŭ reo năm phĕ pơ kao kơ mưt bri. Đơ̆ng kră sơ̆ bơ ngai Êđê đĭ băt kơ pơm pai tơ mam sa đơ̆ng pơ kao kơ mưt. Yua thoi noh um rup pơ kao kơ mưt bri kŭm đei tơ roi truh lơ̆m nơ̆r pơ đơ̆k Êđê. Kơ loăi ‘long chăt kư̆ kă âu lăp chôh pơ kao đơ̆ng rŏng kơ dôm ‘măng ‘mi blŭng pơ yan. Ưh khan lăp hơ nhăk tơ drong ‘lơ̆ng hơ iă kơ bri kông Tây Nguyên mă dôm ‘măng sŏng sa hơ yơ đei tơ mam sa đơ̆ng kơ loăi pơ kao kơ mưt pă jor gŏ por gô ưh pă đei 1 găr hơ yơ.

Pơ kao kơ mưt

Mŏ H’Lai Hđơ̆k, plei Čuôr Knia, Xăh Ea Bar, apŭng Ƀuôn Đôn dêh char Dak Lak tơ băt, pơ kao kơ mưt pơm pai đei lơ tơ mam ‘lơ̆ng. Đơ̆ng rŏng kơ phĕ ƀrŏk lak kơ đoh hŭt đĭ pơ kao, lăp iŏk dơng lăm đĕch. ‘Nâu jĭ tơ mam ‘lơ̆ng hloh kơ pơ kao yua vă pơm pai lơ tơ mam sa ‘lơ̆ng hơ iă.

“Trong pai mă mônh bơ̆n ôp rơ goh, hơ tŭk hăm đak tŏ, kôch hơ tŏk lê̆ hrĕng đak păng tŭl hăm ƀum ngô. Trong mă 2, bơ̆n kŭm hơ tŭk, kôch hơ tŏk lê̆ hrĕng đak, đơ̆ng rŏng ‘noh sao hăm ka hơ tŭk, dăh mă ka iĕ, tăh thim hơ mrĕ sa tôch kơ ‘lơ̆ng.”

Pơ kao kơ mưt

‘Ngoăih kơ ‘noh, dơng đơ̆ng pơ kao gơh hơ tŭk, pơ tŏ dăh mă sao hăm klak iĕr gô vei đêl ƀâu phu hơ drô̆ đơ̆ng pơ kao tôch kơ ‘lơ̆ng. Dơng pơ kao kơ mưt gơh tŭl hơ drih dăh mă ƀuh khôi tơ̆ ŭnh kŭm hăm ka kro, ƀoh hơ mrĕ păng ngot tŭl hĕch jing tơ mam sa ‘lơ̆ng. ‘Nhŏng Y-Đăp Êya, plei Nui, xăh Tâm Thắng, apŭng Cư Jut, dêh char Dak Nông tơ roi, hơ drol sơ̆, mưh rim ‘măng năm tơ̆ mir, kon pơ lei lơ̆m pơ lei phĕ đei 1 reo hơ nhăk brŏk pơm pai tơ mam sa. Mă lei dang ei đei lơ tơ moi tơ chă răt pơ kao kơ mưt brŏk pai sa kơ na lơ̆m pơ yan pơ kao kon pơ lei phĕ tĕch ăn kơ tơ moi vă đei dơ̆ng iŏk yua. Kơ lih thoi noh kơ loăi pơ kao gĭt kăl âu kŭm jing khăi bơ̆ih.

“Pơ jao kơ mưt chăt kiơ̆ tơ ring. Mơ̆ng kiơ̆ ‘meh vă đơ̆ng rim bơ ngai gô pơm pai pha ra băl. Ĭnh ‘meh hơ tŭk păng tŭl hăm ƀum ngô, ƀum kơ dĭm iĕ, hơ mrĕ. Dang ei kơ loăi pơ kao kơ mưt bri kŭm khăi bơ̆ih, năm tơ̆ dôm tơ ring hơ tăih biơ̆ ‘mơ̆i mă phĕ đei lơ”.

Pơ kao mưt bri hơ tŭk, tŭl hăm ƀum ngô, ƀum kơ dĭm iĕ, hơ mrĕ

Pơ yan pơ kao kơ mưt bri lăp đei 1 ‘măng lơ̆m sơ năm, hmach tơ pă tơ dăh bu truh tơ̆ pơ lei pơ la Êđê lơ̆m pơ yan ‘nâu mă ưh kơ đei sa lăng tơ mam sa đơ̆ng pơ kao kơ mưt bri. Kơ loăi pơ kao kơ mưt bri hmă păng ‘lơ̆ng ưh khan lăp chhơ̆ đei 1 um rup ‘lơ̆ng ăn groi kông bazan mă oei pơm đei dôm tơ mam sa ‘lơ̆ng ƀâu phu bri kông dơ̆ng.

Zawut: Chih

Thuem: Tơ blơ̆