VOV4.Bahnar - Kơ sơ̆ 5/5, tơ̆ plt HCM pơm lêh kĭ pơ kăp jang hơ doi “Fado Go yak hơ doi hăm V Gaming pơ long tơ̆ SEA Games 31 sơ năm 2022”. Kiơ̆ kơ ‘nŏh, Fado Go vă tơ gŭm ăn 2 khul E-Sport (tơ plŏng kơ dâu điên tư) găh tơ drong tơ roi tơ băt păng dôm tơ mam hơ păh đơ̆ng dôm khul E-Sport iŏk đei jơ nei ‘lơ̆ng lơ̆m tơ drong thi pơ long. Jang hơ doi đơ̆ng 2 păh oei pơ jing tơ drong ‘lơ̆ng ăn bơ ngai yoa chă răt iŏk dôm tơ mam đơ̆ng khul E-Sport kiơ̆ trong Fado Go.

‘Ngoăih kơ ‘nŏh, Fado Go pơ kăp vă tơ mât jên tơ iung khul bơ ngai lăng E-Sport, tơ gŭm ăn anih E-Sport tŏk pran ‘lơ̆ng păng kơ jăp đunh. Dang ei tơ drong ‘lơ̆ng đơ̆ng tơ plŏng kơ dâu điên tư tôch lơ kơ na tơ drong yak hơ doi hăm dôm khul kŭm tơ gŭm ăn E-Sport truh jê̆ ƀiơ̆ hăm bơ ngai lăng păng pơih trong jang tŏk pran kơ jăp tơ̆ hơ năp kơnh. Tơ̆ hơ năp dang ei, kiơ̆ đơ̆ng jang hơ doi ‘măng mă âu găh anih tơ gŭm ‘mĕh tơ gŭm ăn Việt Nam hơ tŏk tơ drong hơ mĕng iŏk đei mê đai măih tơ̆ SEA Games tơ̆ tĕh đak kơ dih.

Dơ̆ng: Tơ blơ̆