Pơlei Kuốp, xah Dray Sáp, apŭng Krông Ana jing tơring hơrih jang xa đunh đai kơ kon pơlei Êđê păng Mnông. Pơlei hơtaih đơ̆ng pơlei tơm Buôn Ma Thuột 21 km, oei ah jăl trong đơ̆ng tơkơi Dray Nur năm truh tơkơi Dray Sáp Thượng (oei krao noh tơkơi Gia Long). Pơlei oei vei răk lơ kơjă joh ayŏ juăt jue kăp gĭt kơ kon pơlei Êđê păng Mnông nhen pơdreh chĭng chêng, hơri eirei, hơsuang, et soi hơdrơ̆m đak, et sŏng ƀa ‘nao (et jur xa), brư̆ păng lơ tơdrong jang tanh brong jak, tanh brai, pai tơdrô ge, pơm brŏ kon kông...

Dang ei pơlei oei vei 50 tŏ hnam kơjung juăt jue jing anih dăng oei ăn tơmoi truh tơmang. Đơ̆ng sơnăm 2023, pơlei Kuốp đei dêh char Đăk Lăk tơgŭm asong ming hnam jang, hơmet pơ-‘lơ̆ng cham char, tơlĕch lơ tơdrong jang vă hơtŏk tơmang pơhiơ̆ pơlei pơla.