Đơ̆ng rŏng lơ ‘măng hơri hơxoang tơ̆ plt Buôn Ma Thuột păng dôm apŭng lơ̆m dêh char Đắk Lắk, ‘nao âu, kich hơri “Hơpơi ‘mĕh đơ̆ng Dam Săn” đei pơm tơƀôh tơ̆ hơnăp lơ kon pơlei păng bơngai hưch ‘mêm kơ tơdrong hơri hơxoang plt Hồ Chí Minh. Kĭch hơri âu yoa Nguyễn Cường chih pơchĕh kiơ̆ Tơdrong hơ ‘mon Dam Săn kơ bơngai Rađe, tơƀôh hơdăh um rup Dăm Săn kơtang nuih mơng hăm jơhngâm đon hơpơi ‘mĕh pơjing pơlei pơla păng vei lăng hơdrĕch hơdrung. Tơdăm Dam Săn pơlung đei Hơdruh Măt ‘năr, hơnhăk ba ang hơdăh ăn pơlei pơla, tơ̆k hơdăh đon hưch ‘mêm păng tơdrong arih xa tơ̆ bri kông Tây Nguyên ‘lơ̆ng rŏ.

Yă Lưu Thị Hoa, tơ̆ plt Hồ Chí Minh tơroi: “’Măng mă blŭng inh năng kich hơri Hơpơi ‘mĕh đơ̆ng Dam Săn, inh ƀôh tôch hơiă. Đơ̆ng sơ̆ inh năng tôch lơ cải lương, kich hơri mă lei ưh kơ ƀôh 1 tơdrong pơm kĭch hơyơ hơiă thoi noh. Bơngai kơtang nuih mơng Dam Săn tôch ‘mêm kơ pơlei pơla, đei jơhngâm pran kơtang păng păr ang jơ̆p tơring lơ̆m teh đak vă rim bơngai pơm kiơ̆”.

Kĭch hơri yoa dôm bơngai hơri hơxoang kơ Khul hơri hơxoang hơdrĕch kon kông Đắk Lắk pơm. Lơ̆m noh, bơngai pơm Dam Săn ‘nŏh jĭ Nghệ sĩ ưu tú Y Joel Knul păng pơm Bia H’Nhí (hơkăn Dam Săn) yoa hơkăn sư ‘nŏh Bơngai hơri hiôk H’Lueng Niê pơm.

Nghệ sĩ ưu tú Y Joel Knul pơđou, đơ̆ng ‘lơ̆p ‘nhŏng đei mơ̆ng yă ƀok hơri hơ ‘mon păng tôch hơiă Dam Săn yoa sư kơtang, nuih mơng, chu hŭt hơkâu yoa pơlei pơla. Yoa thoi noh, mưh đei pơm, ‘nhŏng tôch hơiă păng hưch hanh. Rim ‘măng pơm dăh mă pơtâp, ‘nhŏng ƀôh tôch čhôk ‘nă. Dôm kơjă kăp gĭt đơ̆ng mĕ ƀă, yă ƀok sơ̆ nhen mât hrơm lơ̆m sĕch kar: “Inh pơm Đam San, đei lơ tơdrong inh ƀôh tôch hơiă, čhưu lơ̆m jơhngâm, yoa kơdih kâu nhen thoi mât kiơ̆ tơdrong arih đơ̆ng bơngai inh pơm ‘nŏh. Ƀôh dôm tơdrong jơhngâm, hŭt hơkâu ‘nŏh, ƀât yơ̆r ti kŭm ƀôh tôch hưch hanh, oei ƀât H’Nhí kuăr păng kăp ti Dam San ‘nŏh tôch hơiă, inh mă lĕch đak măt hloi. Tơpă ‘nei um rup ‘nŏh ưh kơ chrih kiơ mă lei pơm ưh kơ ƀônh ôh, tôch hơiă. Tơdrong pơm kich hơri đơ̆ng Bơngai pơcheh ƀai hơri Nguyễn Cường chih iŏk đơ̆ng tơdrong hơ ‘mon “Dam San” đei lơ tơdrong tôch ‘lơ̆ng hơiă”.

Kiơ̆ Nghệ sĩ ưu tú Y Joel Knul, blŭng a, tơdăm Dam Săn đei pơjao ăn bơngai nai pơm ră. Mă lei lơ̆m jơ tơƀâp păng pơm pơlong năng, Bơngai pơcheh ƀai hơri Nguyễn Cường tơtă rơih ‘nhŏng pơm Dam Săn dơ̆ng. Jĭ bơngai juăt chă hơri, mưh pơm kich hơri, ‘nhŏng athei adrin pơtâp hơnơ̆ng. Kơlih thoi noh, mă mưh kich hơri Hơpơi ‘mĕh đơ̆ng Dam Săn đei pơm, đei lơ kon pơlei lăp đon ‘mĕh năng ‘nŏh jĭ tơdrong tôch hơiă, tôch gĭt kăl lơ̆m tơdrong jang đơ̆ng kơdih.

Vă jê̆ 25 sơnăm bơ̆ jang hơri hơxoang păng hơnơ̆ng 15 sơnăm bơ̆ jang hăm Khul hơri hơxoang hơdrĕch kon kông Đắk Lắk, Nghệ sĩ ưu tú Y Joel Knul iŏk đei lơ tơdrong jơnei, iŏk đei lơ mê đai măih, tơmam hơpăh tơ̆ dôm tơdrong thi, hơri hơxoang lơ̆m păng ‘ngoăih kơ teh đak. Nhen thoi Mê đai Hu sơnăm 2019 păng Mê đai măih sơnăm 2022 lơ̆m tơdrong thi hơri hơxoang ASEAN, Mê đai Hu lơ̆m tơdrong hơri hơxoang lơ̆m teh đak sơnăm 2021,…

Mŏ H’Su Yn Byă, tơ̆ plt Buôn Ma Thuột, dêh char Đắk Lắk akhan: “Nghệ sĩ ưu tú Y Joel hơnhăk ba lơ ƀai hơri, lơ laboa hơri đơ̆ng bơngai Rađe, dôm boa hơri đơ̆ng ‘nhŏng tôch hiôk hơiă, đei lơ bơngai băt truh. Hơpơi ‘mĕh ‘nhŏng hơnhăk ba lơ ƀai hơri hiôk hơiă hlŏh dơ̆ng truh hăm bơngai mơ̆ng”.

Yă Nguyễn Thụy Phương Hiếu, Phŏ Kơdră Anih vei lăng jŏh ayŏ kơ dŏ xoang, tơplŏng kơdâu păng chă tơmang lăng Đắk Lắk ăn tơbăt, nghệ sĩ Y Joel Knul đei pôk ăn hơnăn Nghệ sĩ ưu tú đơ̆ng sơnăm 2015, ƀât ‘nao 40 sơnăm, dang ei jĭ bơngai ‘lơ̆p hlŏh lơ̆m kơsô̆ 4 ‘nu nghệ sĩ ưu tú tơ̆ dêh char. Ưh lăp đei ƀơ̆r hơri djrang, hiôk hơbôn đơ̆ng bơngai Tây Nguyên đĕch, Nghệ sĩ ưu tú Y Joel Knul oei đei đon jang tôch tơnăp, tôch hưch hanh tơdrong hơri hơxoang păng hơnơ̆ng adrin hŏk pơhrăm vă bơ̆ jang gơ̆h hlŏh dơ̆ng. Dang ei, nghệ sĩ Y Joel đei tôm tơdrong kăl đei bơih, kơna Anih jang oei pơm pơkĕh hla ar apinh Teh đak pôk hơpăh ăn hơnăn Nghệ sĩ Nhân dân.

“Nghệ sĩ ưu tú Y Joel Knul kŭm hơnơ̆ng adrin hơmet pơ ‘lơ̆ng kơdih kâu lơ̆m tơdrong hơri, lơ̆m rim tơdrong jang đơ̆ng Khul hơri hơxoang hơdrĕch kon kông dêh char, kŭm hăm Khul pơjing 1 tơpôl mât 1 ƀơ̆r đon păng roi đunh jang tŏk roi ‘lơ̆ng. Anih vei lăng kŭm pơjing tơdrong ‘lơ̆ng vă Nghệ sĩ ưu tú Y Joel Knul đei pơtâp pơhrăm, iŏk đei dôm tơdrong jơnei ‘lơ̆ng hơiă, chih hơmet tôm tơdrong kăl vă gơ̆h pôk ăn hơnăn Nghệ sĩ Nhân dân truh âu kơnh”.

Hăm dôm tơdrong adrin păng bơ̆ jang tôch tơnăp, Nghệ sĩ ưu tú Y Joel Knul hlôi păng tŏk bok iŏk đei lơ tơdrong jơnei lơ̆m tơdrong hơri hơxoang, iŏk đei tơdrong ‘mêm kơ eng đơ̆ng lơ kon pơlei. Kŭm hăm hơri, dang ei ‘nhŏng oei ‘mĕh chă trong jang ‘nao lơ̆m tơdrong hơri, hơxoang Tây Nguyên, hăm đon hơmĕng gô akŏm đei păng pơm ‘nao dôm ƀai hơri găh Tây Nguyên, pơjing đei tơdrong joh hơri hơxoang ‘nao vă pơvih ăn kon pơlei.