VOV4.Bahnar – Lơ̆m tơdrong Pơlong Tơdra hri jâ̆p teh đak đei pơgơ̆r tơ̆ pơlei tơm Buôn Ma Thuột, Jơnŭm Nhak sih Việt Nam jang atŭm hăm Jơnŭm Văn hŏk Ngê̆ thươ̆t dêh char Đăk Lăk hlôi pơgơ̆r pơma đam Tơdra hri kră xơ̆ Tây Nguyên lơ̆m tơdrong erih tơdra hri ‘nao hrei âu. ‘Măng pơma đam hơvơn lơ bơngai jang găh joh ayŏ truh akŏm pơma dơnuh, hăm lơ ƀai đŏk tơbang kăp gĭt.

        Tơ̆ ‘măng pơma đam, rim bơngai tang măt tơroi găh dôm tơdrong nhen: hlôh vao găh chih pơcheh tơdra iŏk yua dôm tơdra hri kră xơ̆ kơ dôm hơdrung kon kông tơ̆ tơring; iŏk yua tơdra kră xơ̆ vă tơmơ̆t lơ̆m tơdrong pơcheh ‘nao; tơdrong kăp gĭt găh tơdra hri lơ̆m hri hơ ‘mon Tây Nguyên; um ai joh ayŏ kăp gĭt tơdra hri Tây Nguyên lơ̆m tơdrong erih păng tơdra hri ‘nao hrei âu. Rim bơngai tang măt akhan, vă pơcheh minh ƀai hri ‘nao đei tơdra hri kon kông dăh mă tơring teh, bơngai chih pơcheh adrol hloh noh athei tơrĕk, băt hơdăh đei tơdra hri kơ tơring noh kiơ̆ dôm tơdra hri kră xơ̆ păng pơdreh tơdra hri kră xơ̆, băt hơdăh păng iŏk mă noh pơm hơnăn tơm vă chih pơcheh tơdra hri ‘nao. Nhak sih Mạnh Trí tơ̆ Đăk Lăk pơtruh nơ̆r: “Mă kăl noh ba athei hrau hăm dôm tơdrong erih, chih akŏm vă hram tơdra dơ̆ng, kơtơ̆ng noh đe băt hloi âu jing tơdra hri kơ hơdrung kon kông yơ, ƀơ̆t doh tơdrong hơtŏk pơtơm yak kiơ̆ trŏ trong, ưh kơxĭ hăp tơblơih jing mă nai ôh, ba ưh đei pơhnŏng mă lei hăp tơblơih noh hăp gô hiong pơđĭ dôm um ai dơnơm kơ joh ayŏ minh tơring”.

        Lơ bơngai tang măt duh tơroi đon kơchĕng kăl xơkơ̆t păng pơtoi vei răk tơƀăk mong dôm tơdra hri kră xơ̆ vă hơtŏk jing dôm tơdra hri ‘nao lơ̆m chăl erih hrei âu. Mă lei, tơdrong hơtŏk âu kăl đei xơkơ̆t păng athei vei đei tơdrong tơm lơ̆m tơdrong hơtŏk, tang găn pơm hiong dơnơm um ai joh ayŏ păng tơm a hla chă kơ minh tơdra kră xơ̆ ăh tơmơ̆t iŏk yua vă pơjing minh tơdra ‘nao. Nhak sih – Ngê̆ sih ưu tŭ A Đuh tơ̆ dêh char Kon Tum tơroi: “Kiơ̆ kơ inh noh nĕ phă lê̆ tơdra xo đơ̆ng kon pơlei, dang tơdra tơm duh oei vei thoi adrol. Oei găh hơtŏk, kiơ̆ kơ dôm tơdra tơm noh mă bơ̆n hơtŏk pơ ‘lơ̆ng, dang hăp oei anih pha ưh kơxĭ iŏk mă tơm noh vă phă tơpăi dơnơm hăp ôh, noh jing tơdrong glăi kơ po, oei bơ̆n băt iŏk yua tơdra mă noh bơ̆n pơm ăn kơ hăp hiôk ‘lơ̆ng hloh dơ̆ng noh pơtơm trŏ hăm tơdrong akhan hơtŏk, chih pơcheh”

          Hăm 12 ƀai đŏk tơbang lơ̆m tơdrong akŏm, rim bơngai tang măt tơmơ̆ng păng pơma đam tơpăt chă trong vă pơjing tơdra ‘nao trŏ ƀlep hăm tơdrong erih ‘nao dang ei păng pôk pơ ư đei um ai joh ayŏ kăp gĭt kơ tơdra hri kră xơ̆, juăt jue kon kông Tây Nguyên. Nhak sih Đỗ Hồng Quân, Kơdră Jơnŭm ngê̆ thuơ̆t Jơnŭm nhak sih Việt Nam xơkơ̆t: ‘nâu jing hơnăn kăp gĭt kăl păng dôm nơ̆r tơgop lơ̆m ƀai đŏk tơbang noh trŏ ƀlep rơgei. ‘Măng pơma đam jing tơdrong jang hơlen pơkăp đei lơ kơjă kăp gĭt ăh ‘măng pơlong tơdra hri jâ̆p teh đak ‘măng mă âu. Nhak sih Đỗ Hồng Quân tơroi: “Hăm dôm ƀai đŏk tơbang noh rim bơngai đei minh tơdrong hơpơi atŭm noh pơm thoi yơ vă ăn tơdra hri kơ Tây Nguyên bơ̆n dâu ưh adrô̆ vei răk nhen tơm, mă đei trong hiôk gơh chă hơtŏk, pơih xă kiơ̆ dôm tơdrong ‘nao kơ chăl bơngai chih tơdra hrei âu. Păng tơdrong kăp gĭt dơ̆ng noh ưh adrô̆ iŏk yua dôm tơdra kră xơ̆ kơ dôm hơdrung kon kông Tây Nguyên mă tơdra noh vă bơ̆n pơcheh jing dôm tơdra ‘nao, dôm hơnăn ‘nao, thoi noh pơtơm gơh hơtŏk đei tơdrong rơgei ‘lơ̆ng păng duh trŏ hăm tơdrong hơpơi ‘meh đơ̆ng kon pơlei, dang tơdra hri noh yak đơ̆ng tơdra hri kră xơ̆ truh tơ̆ tơdra ‘nao dang ei”

Lan chih păng pơre nơ̆r