Tơbăt 77 sơnăm Năr lĭnh jĭ rơka - lĭnh lôch tang ăn teh đak, gơmăng hei (5/8), tơ̆ Hnam joh hơri tih Hà Nội, Khŭl Tơgŭm ŭnh hnam lĭnh lôch tang ăn teh đak Việt Nam, Anih pơdăh ti vi Ki thuơ̆t kơ sô̆ VTC, Hla ar chih tơroi Bơngai jang păng Tơpôl (Anih tơm vei lăng Bơngai jang Lĭnh jĭ rơka păng Tơpôl) jang hơdai hăm Kŏng ti hơtŏk tơiung tơroi tơbăt Joh ayŏ  Việt Nam păng dôm anih jang ƀơm truh pơgơ̆r Tơdrong joh hơri hơsoang “Arih ling lang hăm teh đak”.

Tơdrong joh hơri hơsoang “Arih ling lang hăm teh đak” đei pơgơ̆r vă pơtăl jơhngơ̆m đon “Nhă đak ƀlŏk kơ tu” “Băt bơnê” đơ̆ng hơdrĕch hơdrŭng Việt Nam, hơdai hăm krao hơvơn rim kơdră, rim anih jang, rim khŭl jang chĭnh trĭ - tơpôl, anih mơdro sa, rim bơngai lơ̆m teh đak hơnơ̆ng ‘măn tơdrong bơngơ̆t truh hơdăh ‘lơ̆ng, ƀlŏk hơdơ̆r kơ đe Mĕ Việt Nam nuih mơng, đe Lĭnh nuih mơng tôch tang ăn teh đak, ŭnh hnam teh đak tơgŭm - bơngai đei kŏng hăm kach mang. Kiơ̆ đơ̆ng noh, pơtho pơhrăm tơdrong joăt joe kach mang, jơhngơ̆m đon ‘mêm kơ teh đak, chhôk ‘nă hơdrĕch hơdrŭng păng hơtŏk ‘lơ̆ng đon hlôh vao jang tơnăp đơ̆ng jơhnơr mơlôh năr ‘nâu păng ning nai kơnh găh tơdrong joăt joe “Nhă đak ƀlŏk kơtu” đơ̆ng hơdrĕch hơdrŭng Việt Nam.