Đei tơlĕch jang đơ̆ng ‘năr 23/11 sơnăm sơ̆ păng pơdui đunh truh ‘năr 21/2 sơnăm ‘nâu, tơdrong pơlong rup phĭn ‘lơ̆ng “ Cheh phe Việt Nam - Tơdrong jang pơcheh tơmam joh ayŏ kăp gĭt apŭng plĕnh teh” ‘noh đei 4 tơdrong jang găh anih jang cheh phe Việt Nam, yak truh tơdrong tơm pôk pơ ư cheh phe Việt Nam. ‘Nâu kŭm jing 1 lơ̆m 18 tơdrong jang tơm đơ̆ng Lêh cheh phe Buôn Ma Thuột ‘măng mă 8, sơnăm 2023.

Đơ̆ng rŏng 3 khei tơlĕch jang, khŭl pơgơ̆r hlôi iŏk đei hloh 1.100 ƀai vang pơ long đơ̆ng 170 ‘nu bơngai pơcheh truh đơ̆ng 30 dêh char pơlei tơm lơ̆m teh đak gơih ăn vang pơ long. Kiơ̆ đơ̆ng hơlen lăng hlôi rơih iŏk 76 hlak rup phĭn ‘lơ̆ng vă pơdă lơ̆m pơdă tơƀôh păng pơjao 15 tơmam hơpăh ăn kơ dôm rup ‘lơ̆ng hloh, ‘noh đei 4 jơnei gĭt kăl hơtŏ hăm 4 tơdrong jang, 10 jơnei pơ chhơp jơhngơ̆m păng 1 jơnei yua đơ̆ng tơmoi rơih iŏk. Kiơ̆ hơlen lăng đơ̆ng Anih pơgơ̆r, đei lơ rup ‘lơ̆ng, tơgŭm păr ang um rup Việt Nam, păr ang um rup cheh phe Buôn Ma Thuột truh hăm tơpôl hưch hanh kơ cheh phe lơ̆m apŭng plĕnh teh.