VOV4. Bahnar - Pơgơ̆r tơbăt 92 sơnăm Năr pơjing Đảng (3/2/1930-3/2/2022), gơmăng hei, năr 26/1, tơ̆ Hnam joh hơri tơm, Báo Điện tử Đảng Cộng sản Việt Nam, găh Ban Tuyên giáo Trung ương pơgơ̆r Tơdrong pơgơ̆r jŏh hơri gĭt kăl “Vei kơ jăp jơhngơ̆m đon lui”. Tơdrong pơgơ̆r đei hơmet ăn tôch kơ ‘lơ̆ng, pơjing 2 tơdrong ‘nŏh: “Vei kơ jăp jơhngơ̆m đon lui” păng “Tĕh đak chô̆h pơkao”, hăm hlŏh 10 tơdrong jŏh hơri gĭt kăl đei hơmet ăn ‘lơng hơ iă hlŏh. Tơdrong pơgơ̆r au jing jơ ‘năr tơƀlŏk dơ̆ng chăl sơnăm nuih mơng pran kơtang gơ̆h hơgei kơ Đảng, dôm chăl sơnăm gĭt kăl, iŏk đei jơnei tĭh tên kơ chăl sơnăm jang kơ kĕch mang Việt Nam kơ yuơ Đảng chĕp pơgơ̆r; sơkơ̆t hơdăh jăl trong 92 sơnăm iung tơ jră, tơ iung pơjing păng atŏk tơ iung; tơƀlŏk tơbăt dơ̆ng dôm trong jang gĭt kăl yak hlŏh tơnap tap, hrat hrĭn, tơdrong lôch răm atŭm hăm tơdrong jơnei tĭh tên kơ kon pơlei hlôi iŏk đei kơ yuơ Đảng păng Kơdră chĕp pơgơ̆r tĕh đak Hồ Chí Minh chĕp pơgơ̆r. Hlŏh đơ̆ng noh, sa roi hlôh vao hlŏh dơ̆ng păng hưch hanh hơmanh bơnê găh hơdrech hơdrung Việt Nam, găh Đảng Cộng sản Việt Nam nuih mơng gơ̆h hơgei pran kơtang iung tơblăh kơ yuơ pơm rơngei keh kong hiôk hian kơ Tĕh đak, kơ yuơ hơnŭk hơnoa kơ kon pơlei.

Tơblơ̆ nơ̆r: Amazưt