Vă jê̆ 200 ‘nu bơngai pơlong đơ̆ng 12 Anih vei lăng choh jang xa păng atŏk tơiung tơring tơrang pơjei băl 4 môn: teh sŏk iĕr, tĕh ƀŏng ƀan, teh tennis, đă ƀŏng lŏng rĕng tơmam đei ming pơdơ̆ng, hăm đĭ đăng 18 tơdrong thi.

Pơma ƀât blŭng jơ pơih pơgơ̆r, kơdră chĕp kơ̆l Anih vei lăng choh jang xa păng atŏk tơiung tơring tơrang dêh char Đắk Lắk, akhan: ‘nâu jĭ tơdrong tôch gĭt kăl găh chinh trĭ, tơpôl, vă tơguăt jơ̆p tơring, pơjing jơhngâm đon pơjei băl jang, hơnơ̆ng tưk tơiung tơdrong krao hơvơn “Pơtâp pơhrăm thoi Ƀok Hô ‘mêm kơ eng” ăn bơngai jang, đoàn viên công đoàn tơ̆ anih jang.

Atŭm hăm ‘nŏh, ‘nâu kŭm jing jơ năr vă đe kăn ƀô̆, bơngai jang tơ̆ anih choh jang xa, atŏk tơiung tơring tơrang kơ dôm dêh char Đông Nam ƀô̆ păng Tây Nguyên hơtŏk tơdrong tơƀâp, hŏk iŏk đơ̆ng băl dôm tơdrong kăl, ‘lơ̆ng, hơmet kơjăp tơdrong pơvei, mât 1 jơhngâm vang tơgŭm băl jang đang ‘lơ̆ng tơdrong jang đei pơjao.