Hlôi jing juăt, rim pơgê hrôih iung đơ̆ng tep, tơdrong blŭng a mă ƀok Kơ Să Ha Nhiếu (tơ̆ xăh Phú Hội, apŭng Đức Trọng, dêh char Lâm Đồng) pơm noh chơ chă hơyuh rapor vă mơ̆ng Tơdrong rapor hăm nơ̆r K’Ho kơ Rađiô nơ̆r pơma Việt Nam, kơyuơ Anih jang Rađiô nơ̆r pơma Việt Nam pơm jang tơ̆ Tây Nguyên chih akŏm păng pơre nơ̆r. Ƀok tơroi: Hloh 20 xơnăm kơ âu, Tơdrong tơroi hăm nơ̆r K’ho đơ̆ng Rađiô nơ̆r pơma VN  hlôi jing boăl juăt kăp gĭt.

Rim nơ̆r pơre kơ dôm bơngai chih akŏm jing juăt bơih. Kơyuơ noh, ƀok hơdơ̆r hơdăh rim tơdrong rapor păng jơ pơih pơre nơ̆r rim năr păng rim giĕng. Lơ̆m noh, ƀok lăp hloh hăm tơdrong pơih tơdrong hơri kră, pơtho găh trong pơm jang, pơtho kon mon kon xâu pơ 'nam pơm jang: “Inh ƀôh dôm tơdrong tơroi pơih lơ̆m Rađiô noh 'lơ̆ng. Hơnơ̆ng pơtho kon pơlei băt trong pơm jang, hơri tơdra kră xơ̆, hơri tòng bơr nhen ngê̆ nhơ̆n Ka Ding. Đei lơ ƀai hơro pơtho kon mon kon xâu pơ 'nam jang xa, athei băt tanh hơkă, krôh. Inh hơpơi 'meh dôm tơdrong âu đei pơih pơre hơnơ̆ng lơ̆m rađiô vă kon pơlei tơmơ̆ng păng đơ̆ng noh tơgŭm hơtŏk tơdrong hlôh vao”

Oei hăm yă Cil Bri, Phŏ Kơdră Jơnŭm jang Drăkăn dêh char Lâm Đồng, Tơdrong rapor hăm nơ̆r K’ho kơ Rađiô nơ̆r pơma VN noh kênh tơroi tơbăt dơnơm kơ Teh đak. Ưh hơdrô̆ pơtruh kơtơ̆ng ang lơ̆m teh đak păng lơ̆m apŭng plenh teh, mă oei tơtom chih akŏm tơdrong đei ƀôh tơ̆ tơring Tây Nguyên pơma atŭm păng Lâm Đồng pơma hơdrô̆. Kiơ̆ kơ yă Cil Bri,  dôm tơdrong đei tơroi hăm nơ̆r pơma păng chư chih kơ bơngai K’ho lơ̆m hơyuh rapor adoi nhen lơ̆m trang web VOV4.K’Ho kơ VOV Tây Nguyên, hlôi tơgŭm ăn kon pơlei băt hơdăh hloh tơdrong hlôh vao tơnăp păng tơtom: “Inh lăp tơmơ̆ng dôm tơdrong tơroi hăm nơ̆r K’Ho kơ Rađiô nơ̆r pơma Việt Nam tơ̆ tơring Tây Nguyên. Kơlih âu tơ̆ âu đei lơ tơdrong tơroi găh joh ayŏ, chĭnh trĭ, mŭk drăm – tơpôl, vei răk tơƀăk mong joh ayŏ, pơtho pơmai oh athei pơkăp ƀơ̆t rơneh hơ-ioh, adoi nhen băt trong vei rong pơtho akhan kon mon kon xâu tơngăm pơm jang, hŏk pơhrăm, pơtho găh ƀet vaccine bơ̆ng jĭ tôm tong, inh ƀôh dôm tơdrong noh tơnăp hăm tơdrong juăt jang ăn kơdih inh...”

Hăm ngê̆ nhơ̆n ưu tŭ K’Brèm, dang ei oei pơm jang tơ̆ Anih jang Joh ayŏ, Tơroi tơbăt păng Tơplŏng kơdâu apŭng Bảo Lâm, dêh char Lâm Đồng, Tơdrong tơroi hăm nơ̆r K’ho kơ Rađiô nơ̆r pơma VN noh akŏm dơ̆ng tơdrong joh ayŏ juăt jue kon kông po kơdih. Kơlih kiơ̆ dôm tơdrong tơroi “Hơri kră xơ̆ Tây Nguyên”, “Hơri kră xơ̆ 3 tơring”, “Tơdra hơri kră” kơ Rađiô nơ̆r pơma Việt Nam, Ngê̆ nhơ̆n ưu tŭ K’Brèm gơh đei dơ̆ng tơdrong kăl vă 'măn ăn tơdrong juăt jang joh ayŏ kơ po tơ̆ tơring. Ƀơ̆t tơbăt 22 xơnăm pơih rapor Tơdrong tơroi nơ̆r K’ho kơ Rađiô nơ̆r pơma VN, Ngê̆ nhơ̆n ưu tŭ K’Brèm, pơtruh nơ̆r thơ thâu tơnăp thoi âu: “Ƀơ̆t tơbăt 22 xơnăm, inh pơtruh nơ̆r thơ thâu ăn Anih jang rađiô ba lai yơ adoi grăng pran, akŏm năm truh rim tơring vă chih akŏm dôm joh ayŏ 'lơ̆ng rŏ kơ yă ƀok kơdih. Ưh hơdrô̆ dôm ƀai hơri kră xơ̆ nhen đơs ting đơs loong, hơri tam pơ̆t, kồng yai kơ bơngai K’Ho- Mạ, inh hơpơi 'meh tôm kon pơlei atŭm băl pơdjoi păng vei răk um ai juăt jue kăp gĭt mă yă ƀok pơxư̆ ăn”.

Tôm 22 xơnăm pơih rapor, dôm bơngai chih akŏm păng pơre nơ̆r Tơdrong tơroi pơma nơ̆r K’Ho kơ Rađiô nơ̆r pơma VN đei lơ tơdrong vơch. Tôm bơngai jang chih akŏm, chih tơblơ̆ nơ̆r, pơre nơ̆r adoi đơ̆ng rim pơlei pơla kơ dêh char Lâm Đồng truh hăm Anih jang Rađiô nơ̆r pơma VN tơ̆ tơring Tây Nguyên (anih pơm jang tơ̆ pơlei tơm Buôn Ma Thuột, Đăk Lăk) vă iŏk jang tơdrong jang tơm dơnơm âu. Hloh 20 xơnăm tơguăt hăm tơdrong rapor, rim bơngai chih akŏm ưh hơdrô̆ tơbang tơnăp tơdrong tơblơ̆ pơre nơ̆r kon kông kơdih po lơ̆m hơyuh rapor, mă oei đei 'măng năm tơmang truh rim pơlei pơla ataih yaih, akŏm pơma dơnuh hăm boăl mơ̆ng brŏ, chih akŏm tơdrong hơri kră păng chă chih akŏm dôm ƀai chih, pơma đam ƀenh kơ tơdrong hơrih kon pơlei. Ƀok K’Brọp, Phŏ Kơdră Anih pơih pơre nơ̆r kon kông, Anih jang Rađiô nơ̆r pơma VN tơ̆ Tây Nguyên (xơ̆ chĕp pơgơ̆r Khul jang Tơdrong tơroi nơ̆r K’Ho) tơroi: “Hloh 22 xơnăm tơguăt păng yak hadoi hăm Tơdrong tơroi pơma K’Ho, 7 xơnăm jang Phŏ Kơdră Anih pơih pơre nơ̆r kon kông, mă hăm anih jang yơ, kơchư̆k jang kiơ, inh adoi hơdrin keh đang xơnong jang đei pơjao. Ƀơ̆t tơbăt 22 xơnăm Năr pơih pơre tơdrong tơroi mă blŭng hăm nơ̆r  K’Ho, inh thơ thâu hăm tôm 'nhŏng pơmai oh jang chih akŏm păng pơre tơdrong tơroi nơ̆r K’Ho grăng pran ling lang, kơjăp đon kơchĕng chĭnh trĭ, tơguăt hăm tơdrong jang, pơtoi jing gơng tơroh hơ 'nhăk trong pơkăp jang đơ̆ng Đảng păng Teh đak truh hăm kon pơlei K’Ho hăm kơdih nơ̆r pơma kon kông po, tơgop vei răk tơƀăk mong joh ayŏ juăt jue kơ bơngai K’Ho kiơ̆ đơ̆ng dôm tơdrong tơroi păng trang web lơ̆m internet, vă tơdrong tơroi pơre nơ̆r K’Ho ling lang jing tơmam pơ 'lơ̆ng đon bơnôh rim năr ưh gơh kơƀăh păng tơguăt tơjê̆ hăm kon pơlei K’Ho”.

22 xơnăm kơ âu, Tơdrong tơroi nơ̆r K’Ho atŭm hăm 5 Tơdrong tơroi pơma nơ̆r kon kông nai tơ̆ tơring Tây Nguyên, noh: ÊĐê, Jarai, Bahnar, Xơ Đăng păng M’Nông hơnơ̆ng tơguăt tơguăl, atŭm băl jang tơnăp xơnong jang đei tơchơ̆t tơlĕch đơ̆ng Đảng păng Teh đak truh hăm kon pơlei kon kông. Tơdrong tơroi nơ̆r K’Ho hơnơ̆ng jing boăl juăt kăp gĭt kơ pơlei pơla Tây Nguyên.