Dôm năr âu ki, plt Pleiku, dêh char Gia Lai tôch chơt hơiă, hăm tơdrong vang akŏm đơ̆ng vă jê̆ 500 ‘nu bơngai vang pơjei băl lơ̆m tơdrong thi đă ƀŏng lŏng, tơplŏng kơdâu kơ dôm hơdrĕch kon kông lơ̆m tĕh đak ‘măng mă XIII, tơring II sơnăm 2023. Dôm anih thi pơ long lơ̆m plt sơng đei lơ bơngai, kon pơlei lơ̆m tơring truh lăng. Dôm bơngai thi pơlong tơƀôh hơdăh jơhngâm đon thi pơlong tôch ai, tơpăt ‘lơ̆ng.

Bơngai thi Quách Ngọc Hoan, Khul tơplŏng kơ dâu kơ dêh char Dak Lak, lui akhan: “Tơdrong thi sơnăm 2022, Khul Dak Lak dơ̆ng mă mônh đĭ đăng khul găh thi prăh hră. Khul Dak Lak truh hăm tơdrong thi tơplŏng kơdâu kơ dôm hơdrĕch kon kông lơ̆m sơnăm ‘nâu ‘nŏh nhôn adrin tôch ai. Mă đơ̆ng đei lơ khul tôch pran găh dôm môn prăh hră nhen Bình Định, Gia Lai, Kon Tum, Quảng Ngãi, mă lei kiơ̆ đơ̆ng tơdrong pơtâp pơhrăm ‘nŏh khul nhôn kŭm adrin đĭ jơhngâm vă pơtâp pơhrăm, adrin đĭ jơhngâm vă gơ̆h đei nhen thoi sơnăm sơ̆.”  

Tơ̆ tơdrong thi âu, Gia Lai, Đak Lak păng Kon Tum jĭ dôm khul vang thi tôm 7 môn. Ƀok Nguyễn Văn Ý – Phŏ Kơdră vei lăng tơdrong jŏh ayŏ kơ dŏ xoang, tơplŏng kơ dâu păng chă tơmang lăng dêh char tơroi: Đĭ 10 sơnăm bơih Gia Lai ‘nao pơgơ̆r dơ̆ng tơdrong thi tơplŏng kơdâu kơtĕh đak. ‘Nâu jĭ tơdrong tih, ưh lăp dôm tơdrong pơjei băl găh tơplŏng kơdâu đĕch mă oei năng jĭ anih tơƀâp, ngôi hơdai đơ̆ng dôm hơdrĕch kon kông dơ̆ng. Khul tơplŏng kơ dâu Gia Lai đei iŏk tơmât lơ bơngai mơ lôh gơ̆h hơgei. Mă loi hăm tơdrong thi prăh hră đei lơ bơngai prăh tôch đam. Đe ŏh đei pơtâp pơhrăm đơ̆ng lơ ‘măng thi pơlong tơ̆ ‘Măng thi pơlong tơplŏng kơdâu lơ̆m dêh char sơnăm 2022.

Bơngai thi RơChâm Dác – Khul Gia Lai pơma: “’Nâu jĭ ‘măng mă 4, inh vang truh hăm tơdrong thi lơ̆m tĕh đak, lơ̆m 3 ‘măng thi adrol ki inh iŏk đei 6 tŏ mê đai măih. Sơnăm ‘nâu inh iŏk đei 1 mê đai măih găh tơdrong thi kơdâu 100m bơih, inh adrin vă iŏk dơ̆ng mê đai lơ̆m tơdrong thi kơdâu 300m. Inh ‘mĕh iŏk đei mê đai vă pơchơt hăm bôl boăl, kơtum kơtŏng ‘nhŏng ŏh, vă mĕ ƀă ƀôh hưch hanh lơ̆m jơhngâm.”

Tơdrong thi đă ƀŏng lŏng, tơplŏng kơdâu kơdôm hơdrĕch kon kông lơ̆m tĕh đak ‘măng mă XIII, tơring II ưh lăp 1 anih ngôi pơchơt tôch đei yoa ăn rim bơngai vang thi đĕch, mă oei jing 1 tơdrong ‘lơ̆ng vă tưk tơiung tơdrong joh ayŏ kơ dŏ xoang ‘lơ̆ng đơ̆ng sơ̆ păng tơguăt đĭ đăng hơdrĕch kon kông. Tơdrong thi kŭm oei pơm hơtŏk tơdrong jang tŏk đơ̆ng tơdrong tơplŏng kơdâu păng chă tơmang lăng kơ tơring II pơma adrô̆ păng lơ̆m tĕh đak pơma atŭm hai.

Ƀok Nguyễn Liên Phương – Phŏ Kơdră vei lăng jŏh ayŏ kơ dŏ xoang, tơplŏng kơdâu păng chă tơmang lăng dêh char Quảng Ngãi, pơma: “Tơdrong hơiă đơ̆ng năr thi ‘nŏh đĭ đăng khul truh tơ̆ âu, đĭ đăng 13 khul truh tơ̆ âu hăm jơhngâm đon tôch chơt hơiă. Tơdrong tơm ‘nŏh jĭ vă tơƀâp, ngôi pơchơt, jŏh ayŏ kơ dŏ xoang păng tơplŏng kơdâu vă kon pơlei kon kông tơƀâp pơma nuh păng roi đunh roi mât mĭnh ƀơ̆r đon kơjăp ‘lơ̆ng”.

Tơdrong thi sơnăm ‘nâu akŏm đei vă jê̆ 500 ‘nu bơngai thi đơ̆ng 13 tơring đei kon pơlei kon kông arih xa tơ̆ tơring pơbăh đơ̆ng plt Đà Nẵng đei: Phú Yên, Lâm Đồng, Ninh Thuận, Bình Phước, Gia Lai, Quảng Nam, Kon Tum, Khánh Hòa, Đak Nông, Bà Rịa-Vũng Tàu, Bình Định, Dak Lak păng Quảng Ngãi. Pơtêng hăm ‘măng thi mă XII đei pơgơ̆r tơ̆ dêh char Quảng Ngãi lơ̆m sơnăm 2022, tơdrong thi ‘măng mă âu đei dơ̆ng Khul dêh char Bà Rịa-Vũng Tàu hai. Lơ̆m tơdrong thi sơnăm ‘nâu, dôm bơngai thi pơjei băl găh 7 môn đei: kơdâu, đă ƀŏng lŏng drŏ nglo, păh ƀŏng lŏng drŏ nglo-drŏ kăn, prăh hră, hao ‘long sơng, tŭn băl hăm ‘long păng dui băl. 

Vang thi tơ̆ âu, Y Thơ Hwing truh đơ̆ng Khul Dak Lak, pơma: “Jơhngâm đon inh păng đe ‘nhŏng ŏh lơ̆m khul Dak Lak tôch čhôk ‘nă yoa năr thi pơlong jĭ 1 năr pơchơt vă tơguăt đĭ đăng hơdrĕch kon kông kơna inh păng đe ‘nhŏng ŏh lơ̆m khul tôch hơiă. ‘Nâu jĭ jơnăr tôch ‘lơ̆ng vă đĭ đăng pơma atŭm gơ̆h pơjei băl hăm đe ‘nhŏng ŏh hơdrĕch nai. Kiơ̆ đơ̆ng tơdrong thi thoi âu sư pơm tơiung jơhngâm đon hưch hanh hăm tơdrong tơplŏng kơdâu păng pơtâp hơkâu jăn nhen thoi Ƀok Hô sơ̆, đei pơm kiơ̆ hăm tơpôl rim hơdrĕch kon kông. ‘Nâu kŭm jing jơnăr vă dôm bơngai thi hơtŏk hlŏh dơ̆ng đon hlôh vao, gơ̆h hơgei păng iŏk đei lơ tơdrong jơnei ‘lơ̆ng ăn tơring kơdih”.

Tơdrong thi đă ƀŏng lŏng, tơplŏng kơdâu dôm hơdrĕch kon kông tơring II đei pơgơ̆r 2 sơnăm 1 vât, jĭ tơdrong vă jang kiơ̆ Trong jang đơ̆ng Đảng păng tĕh đak găh atŏk tơiung mŭưk drăm, tơpôl, jŏh ayŏ kơ dŏ xoang, tơplŏng kơdâu ăn kon pơlei dôm hơdrĕch kon kông; Tưk tơiung hlŏh dơ̆ng tơdrong pơtâp pơhrăm păng thi pơlong pơm hơtŏk jơhngâm pran, hơtŏk tơdrong arih xa găh jơhngâm đon ăn kon pơlei; hơtŏk tơdrong tơroi tơbăt, krao hơvơn kon pơlei dôm hơdrĕch kon kông adrin vang jang lơ̆m tơdrong krao hơvơn “Đĭ đăng kon pơlei pơtâp hơkâu jăn rok Ƀok Hô ‘mêm kơeng”, hăm đon tơchĕng “Pran vă pơjing păng vei lăng tĕh đak” tơklep hăm tơdrong jang “Đĭ đăng kon pơlei mât mĭnh ƀơ̆r đon pơjing tơdrong arih xa ‘lơ̆ng hơ iă” tơ̆ tơring.