Tơdrong thi sơnăm ‘nâu akŏm đei vă jê̆ 500 ‘nu bơngai tơplŏng kơdâu đơ̆ng 13 tơring đei lơ kon pơlei kon kông arih xa tơ̆ găh Pơbăh, iŏk đơ̆ng plt Đà Nẵng mât tơ̆ lăm, đei: Phú Yên, Lâm Đồng, Ninh Thuận, Bình Phước, Gia Lai, Quảng Nam, Kon Tum, Khánh Hòa, Đak Nông, Bà Rịa-Vũng Tàu, Bình Định, Đăk Lăk păng Quảng Ngãi.

Pơtêng hăm tơdrong thi ‘măng mă XII đei pơgơ̆r tơ̆ dêh char Quảng Ngãi lơ̆m sơnăm 2022, tơdrong thi ‘măng mă âu đei dơ̆ng Bà Rịa-Vũng Tàu vang thi. Lơ̆m tơdrong thi sơnăm ‘nâu, dôm bơngai thi pơjei băl găh 7 môn đei: kơdâu, đă ƀŏng lŏng drŏ nglo, păh ƀŏng lŏng drŏ nglo – drŏ kăn, prăh hră, hao ‘long sơng, tŭn băl hăm ‘long păng dui băl. Tơdrong thi đă ƀŏng lŏng, tơplŏng kơdâu kơ dôm hơdrĕch kon kông lơ̆m tĕh đak ‘măng mă XIII, tơring II sơnăm 2023 vă pơgơ̆r truh đĭ ‘năr 23/6.