Kơsơ̆ 12/11, tơ̆ pơlei tih Đà Lạt, Anih tơm vei lăng joh ayŏ kơ dŏ xoang, tơplŏng kơdâu păng chă tơmang lăng păng Anih vei lăng kon pơlei dêh char Lâm Đồng pơgơ̆r hôp roi tơbăt dôm tơdrong ƀơm truh Thi phim hơiă Việt Nam ‘măng mă 23 pơgơ̆r đơ̆ng ‘năr 21 truh 25/11 âu kơnh. Tơdrong thi phim hơiă kơ Việt Nam ‘măng mă 23 đei 177 phim vang thi, jing kơsô̆ phim vang thi lơ hlŏh đơ̆ng sơ̆ truh dang ei. Lơ̆m noh đei 91 phim đei rơih iŏk đơ̆ng dôm tơdrong thi, păng 56 phim nai.

‘Ngoăih kơ lêh pơih blŭng, lêh pơtôch păng hơpăh tơmam, tơdrong thi phim oei pơgơ̆r lơ tơdrong nhen: pơdă rup “Đà Lạt – Tơiung jơhngâm đon hưch hanh pơm phim”; dôm hop akŏm găh “Tơdrong vei lăng phim mưh atŏk tơiung kơmăy kơmŏk pơm phim”, “Mĭnh ƀar tơdrong kăl vă pơjing kơmăy kơmŏk pơm phim Việt Nam”; tơdrong pơma nuh đơ̆ng dôm bơngai pơm phim hăm bơngai lăng tơ̆ Lâm Đồng; pơm phim tơ̆ dôm anih pơm păng tơ̆ ‘ngoăih; vang năm lăng dôm anih ‘lơ̆ng rŏ tơ̆ Đà Lạt - Lâm Đồng.