Hăm nơ̆r tơbăt “Pơjing kơmăy pơm phim Việt Nam ‘lơ̆ng hơiă păng gơ̆h hơgei”, Tơdrong thi phim Việt Nam ‘măng mă 23 hơnơ̆ng tơƀôh hơdăh tơdrong jŏh ayŏ kăp gĭt kơ teh đak, roi đunh roi rơgei, sơng đei lơ bơngai pơm phim hăm lơ phim ‘lơ̆ng hơiă, vang tơgop tơiung pơjing tơdrong jŏh ayŏ kơ dŏ xoang Việt Nam rơgei, ‘lơ̆ng rŏ.

Đơ̆ng 177 phim, Anih pơgơ̆r rơih đei 146 phim vang thi păng lơ phim hơiă nai hai, pơm tơƀôh lơ tơdrong tôch hơiă. Lơ̆m noh, lơ phim ‘lơ̆ng, hơiă, tơdrong pơchĕh, nơ̆r pơma tôch hơiă. Khul pơm phim đơ̆ng bơngai pơm, chih hơmet, pơtho pơm, kuay phim, truh tăh nhak, pơih jơva re păng hơmet phim tơƀôh hơdăh tơdrong jang roi đunh roi gơ̆h hơgei đơ̆ng kơdih.