Dơnŏ anih tơm vei lăng Jŏh ayŏ kơdŏ soang-Đă ƀŏng lŏng tơplŏng kơdau păng Tơmang pơhiơ̆ jei hlôi pơjing trong pơprŏ jang iung jang kiơ̆ Nơ̆r pơma pơtôch đơ̆ng Tổng Bí thư tơ̆ Hop akŏm Jŏh ayŏ kơdŏ soang lơ̆m teh đak păng Trong iung jang kăl atŏk tơ iung jŏh ayŏ trŭh sơnăm 2030. Ban Tuyên giáo Trung ương pơm tơm pơgơ̆r Hop akŏm teh đak “Tơdrong kăl kơ teh đak, tơdrong kăl jŏh ayŏ, tơdrong kăl ŭnh hnam păng tơdrong trŏ lăp ‘lơ̆ng kon bơngai Việt Nam lơ̆m chăl ‘nao”.

Lơ dêh char, pơlei tơm lơ̆m teh đak hlôi tơlĕch jang kiơ̆ rim Tơdrong tơchơ̆t tơlĕch jang kiơ̆ Nơ̆r pơma pơtôch đơ̆ng Tổng Bí thư Nguyễn Phú Trọng tơ̆ Hop akŏm Jŏh ayŏ lơ̆m teh đak. Hà Tĩnh ‘nŏh dêh char blŭng a pơgơ̆r Hop akŏm Jŏh ayŏ tih lơ̆m dêh char đei tơlĕch jang kiơ̆ Nơ̆r pơma pơtôch Hop akŏm jŏh ayŏ lơ̆m teh đak sơnăm 2021. 

Tơ̆ ‘măng pơma đam Joh ayŏ 2022 hăm hơnăn "Tơchơ̆t, trong jang păng jơhngơ̆m jang ăn hơtŏk joh ayŏ". Pơma ăh ‘măng akŏm âu, Kơdră Hô̆i đŏng Anih jang Kon kông Y Thanh Hà Niê K'dăm ăn tơbăt, Việt Nam jing minh teh đak lơ hơdrung bơngai, hăm 53 hơdrung bơngai kon kông, rim hơdrung bơngai đei kơdih khôi juăt, trong erih xa hăm dôm um ai joh ayŏ kơdih, kăp gĭt adrô̆. Kơyuơ tơdrong noh pơjing Việt Nam đei minh tơdrong joh ayŏ đei lơ khôi juăt păng drơ̆ng minh. Kơyươ noh, vei răk tơƀăk mong kơjă joh ayŏ kon pơlei kon kông vă vei xơđơ̆ng tơdrong lang lap, drơ̆ng minh, păng tơdrong kơjăp xơđơ̆ng lơ̆m hơtŏk mŭk drăm – tơpôl kơ teh đak hơnơ̆ng đei  Đảng, Khul Kơpal teh đak tơrĕk pơm jang. Pơkăl vei răk tơƀăk mong kơjă joh ayŏ juăt jue ‘lơ̆ng rŏ kơ dôm hơdrung bơngai kon kông roi năr roi jing kăl lơ̆m khei năr pơkăp jang hadoi lơ̆m kơpal teh. Atŭm hăm tơdrong tơrĕk vei răk tơƀăk mong joh ayŏ lơ̆m khei năr jang hadoi noh tơdrong pơjing tơguăt tơguăl kơjăp lơ̆m vei răk tơƀăk mong kơjă joh ayŏ juăt jue dôm hơdrung bơngai kon kông hăm dôm tơdrong tơlĕch jang hơtŏk mŭk drăm – tơpôl tơring kon kông, groi kông adoi kăl đei tơlĕch tơchơ̆t.