Yă Lê Thị Trúc Linh, Phŏ Kơdră Anih jang gah Joh ayŏ - Tơroi tơbăt – Tơmang pơhiơ̆ dêh char Đăk Nông ăn tơbăt, ƀơ̆t tơbăt 20 sơnăm tơ-iung pơjing dêh char, kơsô̆ tơmoi năm truh tơmang gô tŏk lơ. Anih jang atŭm hăm Anih jang vei lăng kon pơlei dôm apŭng hlôi tơlĕch hơlen dôm anih dăng oei vă pơtrŏ tơdrong kăl đơ̆ng tơmoi, atŭm hăm noh pơkăl chă hơmet ming dôm anih kăp gĭt vă pơ-‘lơ̆ng ăn tơdrong sơng tơmoi.

Kiơ̆ kơ ‘noh, tơ̆ pơlei tơm Gia Nghĩa păng dôm apŭng tơjê̆ noh Đăk Glong, Đăk Rlấp, Đăk Song, Đăk Mil, đei jê̆ 200 anih dăng oei asong mah ăn hloh 7.100 tơmoi lơ̆m 1 năr. Atŭm hăm noh, dôm apŭng  tơm lơ̆m dôm tuor pơhiơ̆, năm tơmang Hơgơp tơmo apŭng plenh teh UNESCO Đăk Nông như Krông Nô, Đăk Glong, Cư Jút, dôm anih dăng oei adoi hơtŏk pơ-‘lơ̆ng vă sơng tơmoi. Ƀơ̆t ‘măng âu, tơmoi adoi gơhc hă hơlen băt tơdrong hơrih, joh ayŏ, tơmam drăm xa kơ kon pơlei kon kông tơ̆ Đăk Nông tơ̆ dôm tơring tơmang pơhiơ̆ pơlei pơla.