Pơgê năr 26/10, tơ̆ dêh char Phú Thọ, Hnam trưng Yư̆ ƀĭ đăi hŏk Dân tŏk Trung ương pơgơ̆r Lêh mơ̆t xơnăm hŏk 'nao 2022 - 2023.

Nâu jing xơnăm hŏk mă blŭng hnam trưng oei lơ̆m Anih jang Kon kông

'Nâu jing xơnăm hŏk mă blŭng hnam trưng oei lơ̆m Anih jang Kon kông. Lơ̆m dôm hnam trưng kiơ̆ trong pơkăp kăp gĭt kơ teh đak, Hnam trưng Yư̆ ƀĭ đăi hŏk Dân tŏk Trung ương jing hnam trưng yư̆ ƀĭ mă blŭng đei tơ iung pơjing lơ̆m jâ̆p teh đak vă jang kiơ̆ pơkăp ăn kon kông kơ Đảng păng Teh đak găh tơdrong pơtho pơhrăm. Lơ̆m dôm xơnăm kơ âu, hlôi đei hloh 23 rơbâu hŏk tro dôm hnưr bơngai hlôi vơ̆ jing, dang ei oei pơm jang tơ̆ jâ̆p tơring kơ teh đak. Dang ei, Hnam trưng Yư̆ ƀĭ đăi hŏk Dân tŏk Trung ương tŏk bŏk jing hnam trưng đei pơtho hŏk yư̆ ƀĭ đăi hŏk kon kông pran hloh kơ jâ̆p teh đak, hăm 1.000 hŏk tro đei tơmơ̆t hŏk rim xơnăm vă pơtoi hŏk kiơ̆ pơkăp pơtho phôh thŏng adrol kơ xek tơmơ̆t hŏk tơ̆ dôm anih pơtho đăi hŏk.