Hơnih vei lăng cham char Nà Hẩu hăm să hloh 16.000ha, găh lơ̆m 4 tơring: Nà Hẩu, Đại Sơn, Mỏ Vàng păng Phong Dụ Thượng, apŭng Văn Yên, dêh char Yên Bái. Tơ̆ au bri kơdrơ̆ng gĭt kăl tơbăt hơdăh bri kông găh Tu Việt Nam atŭm hăm lơ sem bri brăh, ‘long bri brăh gĭt kăl ... Hơnih vei lăng au jei jing hơnih oei kơ 72 kơloăi xem bri, 240 xem pơnăr, vă jê̆ 50 kơ loăi ƀih kơ ep lep ler, lơ̆m au đei lơ kơ loăi lơ̆m Kơsơ̆p hla bơar Ƀrê Việt Nam păng apŭng plĕnh teh nhen Keh, kơnhu, đŏk, koĕnh, hoa, kop, tơkot, xem sơng…

Găh jih kơ hơnih vei lăng cham char, hăm hơgăt teh să 4.500ha bri gĭt kăl, tơring Nà Hẩu đei hloh 460 ŭnh hnam bơngai Mông erih sa. Vă vei lăng năng tông bri brăh, đơ̆ng sơ̆ kon pơlei hlôi tơlĕch dôm tơdrong pơkăp vei lăng bri păng đei kon pơlei yom kiơ̆. Mĭnh lơ̆m dôm tơdrong au ‘nŏh đei tơdrong joăt soi tơbeh kơ bri. Hrei au tơdrong soi kơ yang bri au hlôi pơjing jing Năr Lêh Têt bri Nà Hẩu lơ̆m năr blŭng puih mak kơ rim sơnăm hăm tơdrong pơgơ̆r tôch hơ iă nhen: Soi tơbeh ăn yang bri, soi tơbeh hơvơh hơvơi hơpơi yang bri kông lăng tông nông gia, soi tơbeh vă kơ ‘mi rŏ tŏ hơlăng, ‘long pơtăm jơk ƀlĭk, jang sa iŏk yua kơ jăp... Ƀok Sùng A Xà, mĭnh ‘nu kon pơlei oei lơ̆m pơlei Bản Tát, tơring Nà Hẩu tơbăt: “Kiơ̆ tơdrong joăt kơ bơngai Mông, đơ̆ng sơ̆ bơih hlôi pơgơ̆r kơ̆m soi yang bri. Rim sơnăm ƀok pơjau hơnơ̆ng soi tơbeh kơ bri vă vei lăng năbng tông bri ‘long, vei lăng đak. Tơdăh bơngai bu pơrơ̆ng chă pơm glăi, koh pơrăm ‘long bri ‘nŏh yang phak pơm ăn bơngai ‘noh jĭ jăn hloi…”

Đơ̆ng tơdrong joăt đei yom kiơ̆, vei lăng bri; lăng bri ‘nŏh pơbŭng hnam kơ kon pơlei, kơ yuơ lơ loh, pơlei pơla ayơ tơ̆ Nà Hẩu jei đei bri kơ̆m, bri yang. Bri au găh hơnih ‘lơng rŏ hloh kơ pơlei, đei lơ ‘long tih, gĭt kăl ... Hăm dôm tơdrong pơkăp "ưh kơ gơ̆h nhĕh tĕk rĕk”, kơna bri hơnơ̆ng vei lăng ‘lơng păng rim bri kơdrơ̆ng au hlôi jing hơnih vei răk tơƀăk mong bri brăh. ‘Nhong Sùng A Chua, mĭnh ‘nu tơdăm oei lơ̆m tơring Nà Hẩu tơbăt:“Lăp đơ̆ng rŏng kơ̆m yang bri, nhôn đei mĕ ƀă, yă ƀok chă pơtho khan vei lăng năng tông bri ‘long mă ‘lơ̆ng păng ưh kơ gơ̆h chă koh pơrăm ‘long bri vă hoei đak lŏk kluơ jrŏh hŭt teh pơm ăn teh rang rar ... đơ̆ng nŏh vă bri đei jing bri kơdrơ̆ng kơ tơring ƀơ̆t dang ei păng ning nai kai ning mônh kơnh”.

Găh hơnih bơ̆ jang ‘noh Hơnih vei lăng Bri Văn Yên, Dơnŏ anih vei lăng năng tông Cham char bri brăh Nà Hẩu, hlôi hơdrin iung jang hơdoi hăm kơdră tơring pơjao vei lăng hloh 3.700 ha bri gĭt kăl ăn kon pơlei vă kon pơlei đei sa hơpăh đơ̆ng kon jên kla ăn iŏk yua cham char bri. Tơring jei pơjing rim khul vei lăng năng tông păng tang găn pĭt ŭnh sa bri. Atŭm hăm ‘nŏh atŏk kơtang pơtho khan ăn kon pơlei; pơjao ăn kon pơlei kĭ pơkăp vei lăng tang găn ŭnh sa bri; xek tơlang kơhret dôm bơngai pơm glăi ... Ƀok Vũ Minh Phúc - Kơdră chĕp pơgơ̆r Hơnih vei lăng bri Văn Yên, dêh char Yên Bái tơbăt:“Nhôn sơkơ̆t hơdăh kon pơlei vang iung jang vei lăng năng tông bri ‘nŏh kăl hloh tơgŭm ăn khul vei lăng bri ƀôh, xek tơlang tơtom rim ‘măng đe pơm glăi. Kơ yuơ lơ lŏh, dôm sơnăm au ki păng khei năr kơnh nhôn hơnơ̆ng pơma dơnuh hăm kon pơlei, mơ̆ng kon pơlei tơgop nơ̆r, đơ̆ng noh pơjing trong jang trŏ ƀlep, vă pơm lơ liơ vei lăng năng tông ‘lơ̆ng hơgăt teh bri dang ei đei”.

Tơdrong lui yom, vei lăng bri hăm đĭ jơhngơ̆m đon kơ kon pơlei atŭm tơdrong hơdrin đơ̆ng hơnih bơ̆ jang, dôm bri kơdrơ̆ng lơ̆m bri bri kơ Hơnih vei lăng năng tông Cham char Nà Hẩu hơnơ̆ng bruh vơ̆ jing ‘lơ̆ng kiơ̆ khei năr dăr sơnăm. Vă kon pơlei đei vei lăng năng tông, tơdrong erih sa roi năr roi phĭ tơtŏ dơnŏ ‘lơng dơ̆ng kơ jăp păng hloh dơ̆ng ‘noh hlôi, tŏk bŏk hơnhăk Nà Hẩu jing hơnih năm truh ‘lơ̆ng rŏ ăn tơmoi tơjê̆ hơtăih tơmang pơhiơ̆ bri kơdrơ̆ng.