VOV4.Bahnar - Truh hăm pơ lei tơm Pleiku lơ̆m năr pơ dơh lêh Quốc khánh 2/9, tơ moi gô ưh kơ hŭt lê̆ năm lăng hơ nih ‘lơ̆ng rŏ tơ̆ Đak Tơ Nueng ‘lơ̆ng hơ iă, đei ư̆ hơ năn ‘noh “ Măt  Pleiku”. Kŭm hăm lăng tơ drong hơ iă cham char bri brăh, lăng dôm pơ lei tơ drong jang joăt joe nhen tanh bơ̆n reo, hơ kăt, kơ đum kơ đŏng, tanh brai vai khăn, tơ moi oei đei sa dôm tơ mam sa ‘lơ̆ng kơ bơ ngai Jarai păng lăng, mơ̆ng, tôn reh bơ̆n tĭng nĭng, chĭng chêng...

Hơ tăih kơ Đak Tơ Nueng dang 1km, hơ nih tĕch mơ dro tơ mam et sa Ier ƀuh Plit tơ̆ plei Têng 1, xăh Tân Sơn, pơ lei tơm Pleiku, dêh char Gia Lai yua đơ̆ng 1 ŭnh hnam bơ ngai Jarai pơ̆ih đunh kơ âu hloh jĭt sơ năm. Vă pơ yua ăn tơ moi tơ mang lăng lơ̆m năr pơ dơh lêh 2/9, Yă H’Nach kŭm hăm bơ ngai jang hơ puih hơ met rơ goh, păng hơ met ăn dôm tơ mam sa ‘lơ̆ng kơ bơ ngai Jarai.

“Lơ̆m dôm năr lêh tih lơ̆m teh đak, păng mă loi ‘noh jĭ Têt rơ ngei hiôk hian ‘năr 2/9, kon pơ lei lơ̆m pơ lei đa hơ met ăn tôch kơ lơ tơ mam sa ‘lơ̆ng. Nhôn hơ met ăn ‘nhĕm iĕr, ‘nhĕm nhŭng bri rong păng 1,2 tơ mam sa joăt joe kơ bơ ngai Jarai nhen ‘nhot hơ te păng 1,2 tơ mam sa đơ̆ng dôm kơ loăi ‘nhot phĕ đơ̆ng mir roh, bri kông. Pơ tih gia nhen hla ƀlang, pơ lăh đing, păng dôm tơ mam sa đơ̆ng tơ ƀăng đei kon pơ lei gơ̆ lơ̆m bri. Hơ drô̆ hăm tơ mam sa đơ̆ng tơ ƀăng, mưh sơ tơ moi ‘noh nhôn gơh pai kiơ̆ pha ra băl, gơh sao hăm ‘nhĕm dăh mă pai hơ te kŭm gơh”.

Ƀă Kiệt roi tơ ƀôh găh hơ nih joh ayŏ Jarai

Hơ nih tĕch mơ dro tơ mam et sa Ier ƀuh Plit tơ̆ plei Têng 1, xăh Tân Sơn, jih pơ lei tơm Pleiku, đei ming man tơ̆ teh să dang 4000 mét vuông. Mă tơ pă ‘noh jĭ hơ nih pơ gar kơ 1 ŭnh hnam bơ ngai Jarai, yua đơ̆ng ƀok ƀă Kiet pơm tơ ‘ngla. Hơ nih pơ gar đei pơm nhen 1 cham ngôi pơ hiơ̆ iĕ, hăm dôm hnam kơ jung ‘lơ̆ng, kơ dih kơ dih. 1 hnam kơ jung să 2,3 jĭt mét vuông măh ăn kơ dôm khŭl tơ moi truh ngôi hơ dai băl vă sa tơ mam sa pơ lei pơ la kơ phô̆ groi kông. Ƀă Kiet tơ roi:

“Nhôn pơ̆ih hnam tĕch mơ dro tơ mam et sa kŭm kiơ̆ kơ tơ mam sa joăt joe kơ bơ ngai Jrai. Tơ̆ âu pơ yua ăn tơ moi dôm tơ mam sa kơ bơ ngai Jarai, ‘noh jĭ tơ mam hla ƀlang. Hmă hmă ‘noh hla ƀlang nhôn sao hăm kơ teh iĕr, tăh thim plăng, pro hơ tâu păng pơ kao tơ neh. Mă 2 dơ̆ng ‘noh jĭ ‘nhot bri pai hăm hơ reng kơ dơ. Hăm pơ lăh đing ‘noh yua phe tơ yông tơ̆ mir roh. Nhôn răt phe đơ̆ng kon pơ lei, hmă hmă ‘noh rơ̆ih dôm găr phe ƀâu phu hloh. Phe hơ drol kơ pơm nhôn tong lơ̆m đak ‘mơ̆i, đang kơ ‘noh năm tơ̆ bri koh ‘lao. ‘Ngoăih kơ pơ lăh đing, ‘noh đei ‘nhĕm iĕr. Iĕr đei răt iŏk đơ̆ng kon pơ lei tơ̆ dôm pơ lei pơ la. Đơ̆ng pơ gê hrôih, kon pơ lei năm ba, hmă hmă đơ̆ng 10 - 20 tŏ. ‘Nâu jĭ ier đơ̆ng kon pơ lei rong tơ̆ dôm pơ lei lơ̆m xăh H’bâo, xăh Chư Dang Ya. Tơ mam vă châm dôm ‘nhĕm ƀuh ‘noh nhôn yua hla ĕch phĕ tơ̆ mir, thim hla kat tŭl hăm ƀoh hơ mrĕ, châm hăm ‘nhĕm iĕr, ‘nhĕm ƀuh”.

            Tŏk bŏk hơ nih pơ gar ‘noh cham ‘nhĕt să. Tŏk tŏk cham đei ‘long gơ̆ng kơ jung pơ brơ̆ng, jĭ hơ nih ‘măn vă pơ gơ̆r roi tơ ƀôh dôm lêh joăt joe kơ bơ ngai Jarai, hăm dôm tơ drong jang nhen tôn chĭng chêng, hơ soang tăp dăr kơ ŭnh, păng tôn reh bơ̆n tĭng nĭng, chĭng klơk:

“Mưh sơng tơ moi nhôn gô hơ met ăn hơ drol tơ drong hơ ri hơ soang, ngôi pơ chơt kŭm hăm tơ moi, mă lei oei kiơ̆ athei đơ̆ng tơ moi pơ kă hơ drol, ‘noh jĭ pơ yua ăn tôn chĭng chêng, tĭng nĭng, hơ soang jum dăr kơ ŭnh. Kŭm mơ̆ng kiơ̆ ‘meh vă đơ̆ng tơ moi, ƀơ̆t lăp đe athei nhôn tŏk hơ ri dôm ƀai hơ ri găh Tây Nguyên vă tơ moi gơh vang hơ soang hăm bơ ngai hơ ri”.

Yă H’Nach hơ met ăn dôm tơ mam sa đơ̆ng tơ ƀăng bri

Hơ dai hăm roi tơ ƀôh tơ drong joh ayŏ ‘lơ̆ng kơ bơ ngai Jarai, ŭnh hnam ƀă Kiet oei tơ̆ plei Têng 1, xăh Tân Sơn, jih pơ lei tơm Pleiku kŭm jing hơ nih pơm tơ drong jang sa ăn lơ kon oh kon kông. Hơ dai hăm ‘noh, ‘nâu kŭm jing hơ nih tĕch dôm tơ mam yua đơ̆ng kơ dih kon pơ lei Jarai pơm đei đơ̆ng vei rong, choh pơ tăm dăh phĕ iŏk đơ̆ng mir roh:

“Đơ̆ng rŏng ‘măng jĭ Covid19, đei tôch kơ lơ hơ druh tơ dăm ưh kơ đei tơ drong jang. Lơ mon hŏk đang oei tam mă chă đei tơ drong jang, năm jang hơ tăih ‘noh kŭm lơ mơ mat tat, dăh mă tam mă chă đei tơ drong ‘nhen ‘meh vă. Yua thoi noh, ĭnh pơm tơ drong hiôk tơ gŭm tơ drong jang ăn đe mon truh tơ̆ âu bơ̆ jang vă đei iŏk yua păng đei jên yua lơ̆m tơ drong arih sa rim năr. 1 tơ drong dơ̆ng ‘noh jĭ ĭnh đa răt iŏk iĕr ăn kon pơ lei, mưh kon pơ lei kăl jên, kăl tĕch ĭnh lai yơ kŭm răt iŏk”.

Mă đơ̆ng lăp jing 1 hơ nih tĕch mơ dro iĕ kơ ŭnh hnam bơ ngai Jarai, mă lei dôm tơ drong jang tơ̆ âu tŏk bŏk tơ gop hơ tŏk tơ iung anih jang tơ mang lăng kơ pơ lei tơm Pleiku dêh char Gia Lai. ‘Moi kiơ̆ đơ̆ng noh, tơ gop pơm tơ drong jang sa ăn kon pơ lei lơ̆m tơ ring, hơ dai hăm vei răk păng tơ ƀăk mong tơ drong joet oei sa ‘lơ̆ng hơ iă kơ bơ ngai Jarai.

Quốc Học – Nay Jek: Vang chih

Thuem: Tơ blơ̆