66 tŏ rup đei ming pơdă hơnhăk ba lơ tơdrong ‘lơ̆ng hơiă pha ra băl, rim rup ‘nŏh jĭ 1 tơdrong tơroi kơ đe linh lơ̆m khul linh kon pơlei, công an kon pơlei lơ̆m khei ‘năr jang tŏk kơ teh đak. Rup “Trường Sơn Đông” čhơ̆ tơƀôh hơyak jơ̆ng đơ̆ng linh tơ̆ jăl trong Trường Sơn đei ư hơnhang ang hơnhăk, um rup bơngai linh kơtang nuih mơng mă đơ̆ng tơjră hăm ƀôm ƀrâm păng tơdrong lôch răm; rup “Nơ̆r Ƀok Hô tơtă”, tơƀôh dôm tơdrong tôch hơiă đơ̆ng Ƀok Hô năm ngôi păng tơtă ăn đe kăn ƀô̆, linh tơblăh tang găn gre păr tơ̆ hơnăp dôm tơdrong tơblăh; Rup “Bôl boăl” tơƀôh um rup đe linh păng kanh sat đak dơsĭ lơ̆m chăl rơngei, vang jang hơdoi, jang 'lơ̆ng tơdrong tơgŭm, vei lăng kon pơlei jang ka mưh jang xa tơ̆ đak dơsĭ. Hăm văjê̆ 40 sơnăm bơ̆ jang lơ̆m khul linh, lơ̆m noh đei 30 sơnăm bơ̆ jang tơ̆ Khul linh tơblăh tang găn gre păr, rim tơdrong găh khul linh hơnơ̆ng jing tơdrong hưch hanh hăm bơngai Čhơ̆ rup Đào Hoa Vinh.

Ƀok tơroi găh tơdrong gĭt kăl đơ̆ng rup “Nơ̆r ƀok Hô tơtă”: “Inh tôch lăp đon hăm tơdrong čhơ̆ Ƀok Hô hăm khul linh tơblăh tang găn gre păr yoa ƀât oei arih sơ̆, Ƀok 'măn ăn khul linh tang găn gre păr truh 11 'măng năm ngôi pơma nuh, năm truh tơ̆ kơdrăn tơblăh vă pơma nuh hăm kăn ƀô̆, linh lơ̆m dôm sơnăm tơblăh Mi sơ̆. 'Ngoăih kơ jet gia pơma nuh găh tơdrong arih xa đơ̆ng đe kăn ƀô̆, linh 'nŏh dôm nơ̆r tơtă đơ̆ng Ƀok tơpă mơ̆n jing trong yak tôch trŏ ăn tơdrong bơ̆ jang đơ̆ng khul linh tang găn gre păr, ưh lăp lơ̆m tơdrong tơblăh, ưh lăp lơ̆m khei 'năr iung tơblăh đĕch mă kơtă lơ̆m khei 'năr rơngei, pơjing păng vei lăng teh đak hloi, dôm nơ̆r tơtă đơ̆ng ƀok oei tôch kăp gĭt, jô̆ hloi hăm đĭ đăng khul linh pơma atŭm, linh tơblăh tang găn gre păr pơma hơdrô̆ oei hơnơ̆ng chĕp kơjăp nơ̆r pơtho đơ̆ng Ƀok păng năng 'nŏh jĭ đon pơhnŏng vă pơtâp pơhrăm lơ̆m tơdrong jang tơiung pơjing păng vei lăng Teh đak hrei 'nâu.”

‘Măng pơdă đei măt 66 ‘nu bơngai čhơ̆ ‘nŏh jĭ dôm bơngai jang lơ̆m Câu lạc bộ chih pơcheh găh tơdrong vei lăng teh đak păng dôm bơngai čhơ̆ rup tơ̆ Hà Nội, Nghệ An, Thanh Hóa, Thái Bình, Phú Thọ, Hải Phòng… Vă rim rup đei čhơ̆ lơ̆m sơnăm 2023 ngăl. Kăl pơma ‘nŏh, hơdai hăm dôm rup čhơ̆ đơ̆ng bơngai jang lơ̆m khul linh, công an kon pơlei, ‘măng pơdă sơnăm ‘nâu oei đei lơ rup đơ̆ng bơngai oei mơlôh tơ̆ ‘ngoăih kơ khul linh vang čhơ̆ hai. 

Tơchĕng ‘lơ̆ng rup păng dôm tơdrong ‘mĕh roi tơƀôh đơ̆ng rup đei ming pơdă “Yak hơdoi hăm khul linh” 2023, ƀok Nguyễn Bằng Lâm, sơ̆ pơm Phŏ Khul chih čhơ̆ Việt Nam akhan: “Tơdrong pơdă âu inh tơchĕng tôch ‘lơ̆ng, ‘lơ̆ng găh kơsô̆ bơngai gơih, ‘lơ̆ng găh kơsô̆ um rup păng kăl loi jĭ dôm um rup vei lăng teh đak, bơngai linh hrei ‘nâu đei roi tơƀôh lơ̆m ‘măng pơdă âu. Nhôn ƀôh tôch hơiă ‘nŏh tơdrong pơdă găh khul linh tơblăh kơ kăch mang dăh mă tơdrong jang kăch mang vei lăng teh đak oei hơnơ̆ng đei rim bơngai tơrek truh, jô̆ hloi dôm bơngai čhơ̆ jĭ linh vang tơblăh sơ̆, mă loi jĭ hăm dôm bơngai čhơ̆ oei mơlôh ưh đei vang tơblăh sơ̆ ră mă lei đe oei vang čhơ̆ tơƀôh ‘năi. ‘Nŏh jĭ tơdrong hơiă vă hơmet ăn sơnăm  2024 pơgơ̆r pơdă lơ̆m teh đak iŏk hơnăn găh khul linh tơblăh kơ kăch mang, 1 tơdrong pơgơ̆r tih đơ̆ng khul chih čhơ̆ găh khul linh tơblăh kơ kăch mang, kŭm hăm set hơlen hơpăh tơmam 5 sơnăm đơ̆ng Anih tơm vei lăng Khul linh teh đak sơnăm 2025.”

Hơiă hăm rup pơdă păng trong pơgơ̆r tơƀôh hơdăh lơ tơdrong ‘lơ̆ng đơ̆ng khul linh kon pơlei, công an kon pơlei lơ̆m khei ‘năr tơblăh sơ̆ păng chăl hrei, mŏ Nguyễn Mai Anh, bơ̆ jang tơ̆ plt Hồ Chí Minh pơma: “Dôm bơngai čhơ̆ roi tơƀôh hăm lơ kơmâu tôch hơiă, um rup, trong čhơ̆ tôch ‘lơ̆ng, đei lơ rup čhơ̆ ‘lơ̆ng tơpă, mă lei inh hơnơ̆ng lăng ƀôh um rup păng nơ̆r tơbăt tôch hơiă đơ̆ng rup čhơ̆ tơƀôh jơhngâm đon hưch ‘mêm hăm khul linh păng đe linh kon pơlei vei lăng teh đak.”

Tơdăh kơsô̆ rup đei ming pơdă lơ̆m dôm ‘măng adrol sơ̆ ưh đei lơ, ‘nŏh hăm ‘măng pơdă “Yak hơdai hăm khul linh” sơnăm ‘nâu, ưh lăp đei lơ rup đĕch mă tơdrong ‘lơ̆ng đơ̆ng rup oei tôch hơđăl ‘năi. ‘Nâu jĭ hơyak năm vă dôm bơngai čhơ̆ rup hơnơ̆ng akŏm jơhngâm pơchĕh găh khul linh păng tơdrong tơblăh đơ̆ng kăch mang, năm truh 'măng tơbăt 80 sơnăm Năr pơjing Khul linh kon pơlei Việt Nam lơ̆m sơnăm truh.