Sơnăm 2022, Anih vei lăng kon pơlei dêh char Kon Tum pơgơ̆r lêh pôk hơnăn Teh đak “Ngê̆ nhơ̆n hơgei” lơ̆m tơdrong jang tơmam joh ayŏ kơdŏ soang hăm 15 ngê̆ nhơ̆n. Jĭ mĭnh lơ̆m 15 ‘nu ngê̆ nhơ̆n đei sơng iŏk hơnăn teh đak “Ngê̆ nhơ̆n hơgei” ‘măng âu, hơdrol sơnăm ‘nao 2023, ƀok A Blung, 73 sơnăm, plei Kon Pao Kla, xăh Đăk Pxi, apŭng Đăk Hà tơroi: “Ĭnh chhôk hơiă dêh păng bơnê đei Kơdră teh đak tơchơ̆t hơpăh hơnăn “Ngê̆ nhơ̆n hơgei”. Đơ̆ng rŏng âu kơnh oei pran jăng, sơnăm 2023 ĭnh gô hơnơ̆ng pơtho ăn kon pơlei păng đe kon sâu lơ̆m pơlei găh tôn chĭng chêng, hơsoang. Bơ̆n athei băt vei răk tơdrong joh ayŏ joăt joe ‘lơ̆ng hơiă đơ̆ng yă ƀŏk bơ̆n sơ̆, ưh kơ lê̆ hiơt hiong. Lơ̆m dôm năr lêh bơ̆n athei pơvei tôn chĭng chêng, hơsoang, ‘noh mă vei đei tơdrong joăt oei sa ‘lơ̆ng hơiă hơdrĕch hơdrŭng, kon pơlei mă đei jơhngơ̆m đon hiôk chơt”.

Lơ̆m ‘măng hơpăh hơnăn "Ngê̆ nhơ̆n rơgei" lơ̆m tơdrong hơri hơxoang, tôn chĭng chêng ‘măng mă III sơnăm 2022, dêh char Lâm Đồng đei 6 ‘nu ngê̆ nhơ̆n đei pôk pơ ư. Dôm ngê̆ nhơ̆n âu đei lơ tơdrong tơgop vă chĕp vei, tưk tơiung kơjă kăp gĭt đơ̆ng tơdrong juăt ‘lơ̆ng kơ kon pơlei bơngai K'Ho, Mạ, Chru.

Ngê̆ nhơ̆n Điểu K'Bôi, tơ̆ xăh Đồng Nai Thượng, apŭng Cát Tiên, 1 lơ̆m 6 ‘nu bơngai đei pôk hơpăh hơnăn "ngê̆ nhơ̆n rơgei" ‘măng mă âu pơma: “Kơdih kâu inh ‘nao đei Đảng, Tĕh đak hơpăh ăn hơnăn ngê̆ nhơ̆n rơgei kơ na inh tôch hơiă, tôch bơnê kơ Đảng, Tĕh đak. Inh vă hơnơ̆ng adrin chĕp vei, tưk tơiung dôm kơjă kăp gĭt đơ̆ng jŏh ayŏ kơ dŏ xoang ‘lơ̆ng hơiă kơ bơngai Mạ nhôn. Lơ̆m tơdrong arih xa rim năr, inh hơnơ̆ng pơtho ăn mihma duch nă adrin jang xa vă gơ̆h đei tơdrong arih xa phĭ tơnŏ, hơnŭk hơnoa. Mă đơ̆ng tơdrong arih xa roi tŏk, mălei dôm tơdrong jŏh ayŏ kơ dŏ xoang kơ kon pơlei Mạ nhôn oei đei vei lăng ‘lơ̆ng păng hơnơ̆ng đei pơtho ăn jơhnơr mơlôh dơ̆ng.” 

Mŏ Bloi, 1 ‘nu bơngai juăt tanh brai tơ̆ plei Chuêt 2, Phường Thắng Lợi, plt Pleiku, Gia Lai hơnơ̆ng đei đon chĕp vei tơdrong tanh brai vai khăn kơ bơngai Jarai. Mŏ Bloi tôch hơiă yoa kơdih kâu jĭ 1 lơ̆m dôm ‘nu bơngai oei ‘lơ̆p, vang vei kơjăp tơdrong tanh brai vai khăn kơ hơdrĕch kơdih: “Vă tanh đei khăn, hơbăn ao athei hŏk đơ̆ng đe yă, đe mĕ pơtho ăn ‘mơ̆i. Hơnơ̆ng chă năng đe yă, đe mĕ tanh vă tanh rok, chĕp vei kơjăp tơdrong jang đơ̆ng yă ƀok sơ̆ ‘măn ăn. Hơpơi ‘mĕh kon sâu đơ̆ng rŏng ning mônh, đe sư huei hŭt hơchăng, athei vei kơjăp tơdrong juăt đơ̆ng hơdrĕch kơdih. Mălei mưh lăng găh mŭk drăm ‘nŏh jên tĕch ưh đei dôm yơ, lăp kăl lơ̆m jơhngơ̆m đon, vă vei tơdrong juăt đơ̆ng hơdrĕch bơ̆n đĕch, inh ‘mĕh pơtho ăn kon mon đơ̆ng rŏng dơ̆ng, vă đe sư gơ̆h tanh, huei hiơt hiong tơdrong juăt ‘lơ̆ng đơ̆ng hơdrĕch kơdih.”

Lơ̆m sơnăm 2022, dêh char Gia Lai chơt hơiă pơgơ̆r Pơm lêh tơbăt 90 sơnăm pơjing dêh char. Lơ̆m kơsô̆ dôm tơdrong jang tơm ‘noh dôm khŭl tôn chĭng chêng, bơngai tanh bơ̆n kơ đum kơ đŏng, tanh brai vai khăn... nhen lĕ “jang đei” lơ̆m dôm tơdrong dôm ƀai tôn, joh hơsoang ‘lơ̆ng hơiă vă pơyua ăn tơmoi mưh truh hăm Gia Lai.

Mŏ Gơnh, oei tơ̆ plei Ktu, xăh Kon Chiêng, apŭng Mang Yang tơroi: “Sơnăm 2022, dêh char pơgơ̆r lêh tơbăt 90 sơnăm pơjing dêh char Gia Lai, đei lơ tơdrong jang joh ayŏ tôch kơ ‘lơ̆ng hơiă, nhen pơgơ̆r tôn chĭng chêng, tanh bơ̆n kơ đum kơ đŏng... ĭnh tôch kơ ‘meh dôm tơdrong jang âu. ‘Nâu kŭm jing ‘măng kon pơlei jơ̆p pơlei pơla akŏm tơƀơ̆p băl, pơma dơnuh, hŏk pơhrăm dôm tơdrong hơiă lơ̆m tơdrong arih sa. Tơdrong ‘nâu gô tơgŭm ăn jơhnơr mơ lôh băt hưch hanh, vei răk tơdrong joh ayŏ joăt joe kơ hơdrĕch hơdrŭng tơ̆ hơnăp kơnh”.