Lơ̆m 1 khei kơ âu, ah rim pơgê, hnam hơkŭm joh ayŏ tơpôl kơ pơlei Kmrơng Prŏng B, xah Ea Tu, pơlei tơm Buôn Ma Thuột, dêh char Đăk Lăk rơ-ông rơ-ang jơva chĭng chêng atŭm hăm nơ̆r hơ hiĕk pơma dơnuh.

Đei jê̆ 30 ‘nu hơ-ioh drŏnglo lŭ lăp hăm tơdrong mă ngê̆ nhơ̆n pơtho pơdreh chĭng chêng, đơ̆ng tơdrong kăl mă blŭng truh tơdrong kloh klĕch lơ̆m pơdreh chêng kong, chêng kram dah mă pơhrăm pơdreh minh ƀai chêng keh kong. Oh Y Thiên Niê tơroi: “Ƀơ̆t blŭng pơhrăm oei ngơ ngơ̆, tam mă băt pơdreh ôh, đei thâi pơtho ăn păng hơmet tôm tơdrong ăn kơ nhôn noh dang ei nhôn pơdreh chĭng chêng gơh hloh. Lăm hŏk nhôn sô̆ hơ-iă kơlih thâi pơtho thoi ăi ”.

Kiơ̆ kơ ƀok Y Wih ÊBan, Ƀĭ thư Chi ƀô̆ pơlei Kmrơng Prŏng B, lăm pơhrăm pơdreh chĭng chêng âu noh tơdrong akŏm jơhngơ̆m đơ̆ng lơ bơngai. Đơ̆ng rŏng kơ lơ ‘măng năm truh rim unh hnam vă hơvơn mĕ ƀă ăn kon hơ-ioh năm pơhrăm pơdreh chĭng chêng, pơyan he sơnăm âu lăm akŏm đei lơ hơ-ioh truh pơhrăm hloh: “Pơih lăm pơhrăm âu, kan ƀô̆ pơlei adoi sô̆ hơ-iă, ƀôh đe mon hăt hot, lơ mon ưh đei chih lơ̆m hơnăn pơhrăm mă lei kơdih truh năm hŏk. Dang ei noh ƀôh đei jơnei bơih. ‘Noh adoi hơdrin pơtho dơ̆ng, ưh hơdrô̆ lăm âu mă sơnăm kơnh noh hơtŏk jang atŭm hloi mă tơnăp ”.

Pơyan he âu, atŭm hăm lăm pơhrăm pơdreh chĭng chêng tơ̆ pơlei Kmrơng Prŏng B, xah Ea Tu, oei đei minh lăm thoi ăi pơih tơ̆ pơlei Kŏ Siêr, phương Tân Lập, pơlei tơm Buôn Ma Thuột. ‘Nâu jing lăm pơhrăm kơyuơ Anih jang tơroi tơbăt, joh ayŏ păng tơplŏng kơdâu pơlei tơm Buôn Ma Thuột pơgơ̆r kiơ̆ tơchơ̆t vei răk tơƀăk mong joh ayŏ kon kông tơ̆ pơlei tơm Buôn Ma Thuột jăl sơnăm 2022 – 2025, sơkơ̆t lăng truh sơnăm 2030.

Yă Phạm Thị Hải Bình, Phŏ Kơdră Anih jang âu ăn tơbăt, atŭm hăm pơtho pơdreh chĭng chêng, anih jang oei pơih 2 lăm hơsuang đơ̆ng tơm truh hơtŏk ăn đe drăkăn kiơ̆ hŏk tơ̆ 6 pơlei lơ̆m pơlei tơm Buôn Ma Thuột.

Dôm lăm pơhrăm pơdreh chĭng chêng păng hơsuang pơih hơnơ̆ng đơ̆ng sơnăm 2019 truh đang ei, hlôi hơvơn đei kơ hrĕng hơdruh tơdăm truh akŏm pơhrăm, kiơ̆ đơ̆ng noh pơtoi tơ-iung păng “vei răk” vă đe mơlôh bơngai kon kông băt ‘mêm kơ joh ayŏ juăt jue:  “Ah chă hơvơn đe oh sơnăm âu pơhăm noh ưh đei hrat nhen dôm sơnăm hơdrol ki ôh, kơsô̆ bơngai pơhrăm sơnăm âu lơ hloh. Nhôn kiơ̆ kơ tơchơ̆t tơ̆ dôm phương, xah tam mă đei pơih lăm pơhrăm pơdreh chĭng chêng păng pơhrăm hơsuang dah mă dôm lăm pơhrăm hlôi đei hơtŏk vă pơih dôm lăm akŏm đei tơdrong lăp adoi nhen hơtŏk tơdrong pơ-‘nam chă pơhrăm hơsuang ”.

Tơguăt hăm tơdrong pơtho pơdreh chĭng chêng lơ̆m lơ sơnăm, ngê̆ nhơ̆n ưu tŭ Y Hiu Niê Kđăm (tơ̆ pơlei M’Duk, phương Ea Tam, pơlei tơm Buôn Ma Thuột) tơroi, tơdrong mă ƀok hơpơi ‘meh hloh noh pơm thoi yơ vă pơtho gơh ƀônh vao hloh ăn đe hơdruh tơdăm hơ-ioh iĕ.

Vă ning mônh kơnh năm tơ̆ yơ duh bưh đe mon adoi oei vao gah chĭng chêng păng vang akŏm lơ̆m khul chĭng chêng tơnăp hloh:  “Pơtho dôm tơdrong kiơ mă kơdih po băt, gah dôm tơdrong kăl hăm chĭng chêng, jô̆ hloi dôm tơdrong kăp gĭt gah chĭng chêng, lăm pơhrăm đei drŏnglo drăkăn lơ̆m rim khei pơdơh he thoi noh inh ƀôh kăp gĭt tơpă, pơm kiơ̆ dôm tơdrong vei răk tơƀăk mong joh ayŏ kăp gĭt kơ kon pơlei Ê Đê. Kon pơlei tơ̆ noh ƀôh băt tơdrong kăp gĭt, pơ-ư pơ-ang hăm tơdrong joh ayŏ kon kông po, hơmet pơ-‘lơ̆ng dôm khôi juăt, đe sư vih hơdơ̆r kơ tơm a la chă, dôm kơjă juăt jue kăp gĭt mă yă ƀok pơsư̆ ăn ”.

Hăm đe hơdruh tơdăm đe hơ-ioh iĕ năm akŏm lăm pơhrăm pơdreh chĭng chêng, rim ‘măng năm pơhrăm noh dôm jơ hŏk sô̆ hơ-iă kơlih đe oh đei hơlen băt gah tơdrong joh ayŏ mă yă ƀok pơsư̆ ăn, băt hơđah trong chă pơdreh chĭng chêng păng brŏ kon kông po. Dôm ƀai hŏk noh ưh hơdrô̆ tơgŭm ăn đe oh băt hơdah hloh tơdrong kăp gĭt lơ̆m năr pơdơh he mă oei tơgop tơbăt gah dôm kơjă juăt jue kăp gĭt ‘lơ̆ng rŏ ăn đe oh pơtoi vei răk tơƀăk mong.