Đê tai khua hŏk akŏm lơ̆m tơdrong hơlen dôm trong jang vă vei răk tơƀăk mong tơdrong hơri hơ-‘mon Tây Nguyên pơma atŭm, tơdrong hơri hơ-‘mon Êđê, Jarai pơma hơdrô̆ lơ̆m hơyuh rapor nơ̆r kon kông tơ̆ tơring Tây Nguyên. Lơ̆m noh akŏm lơ̆m dôm trong jang nhen: chih akŏm dôm tơdrong pơre nơ̆r vă tơroi tơbang, chih akŏm dơ̆ng dôm ƀai hơri hơ-‘mon mă đe ư ang; tơroi tơbăt, pơ-ư pơ-ang hăm đe ngê̆ nhơ̆n đei lơ tơgop lơ̆m vei răk păng pơtho tơdrong hơri hơ-‘mon Tây Nguyên; hơvơn vei răk tơnăp dôm tơdrong jang lơ̆m tơpôl vă vei răk tơƀăk mong kơjă joh ayŏ kăp gĭt pơma atŭm păng tơdrong hơri hơ-‘mon Tây Nguyên pơma hơdrô̆.

Jơnŭm hơlen sơkơ̆t hơdah rim tơdrong, tơgop hơmet dôm tơdrong kăl păng tơblang hơdah dôm tơdrong kăl akŏm lơ̆m đe tai. Ƀok Tạ Đức Toàn, Kơdră Anih jang Kon kông kơ Rađiô nơ̆r pơma Việt Nam sơkơ̆t hơdah: Gah trong tơlĕch jang noh tơnăp, tơbang đei dôm tơdrong hlôi jang, dôm trong jang kăp gĭt păng gơh iŏk jang lơ̆m tơdrong jang kơ Rađiô nơ̆r pơma Viêt Nam.