VOV4.Bahnar - Lăp oei pă tŏ sĕt năr dơ̆ng, Tơ drong pơ long tơ plŏng kơ dâu Ðông Nam Á ‘măng mă 31 (SEA Games 31) pơ tơm pơ gơ̆r. SEA Games ‘măng âu đei pơ gơ̆r tơ̆ Hà Nội păng 11 dêh char, pơ lei tơm tơ jê̆ hăm tơ drong vang akŏm đơ̆ng hloh  7.800 ‘nu bơ ngai pơ long, bơ ngai pơ hrăm, kang ƀô̆ đơ̆ng 11 khŭl tơ plŏng kơ dâu dôm teh đak lơ̆m tơ ring. Anih tơm Hà Nội jĭ tơ ring tơm, anih pơ gơ̆r lêh blŭng a, pơ tôch  18 môn pơ long tơ̆ 14 anih, yua thoi noh, tơ drong jang hơ met ăn pơ gơ̆r tôch kơ tơ tĕnh păng đĭ đang bơ̆ih, gô vă sơng tơ drong pơ long. Tơ̆ Bắc Giang, Hnam pơ long tơ plŏng kơ dâu dêh char hlôi jang đang tơ drong hơ met ăn dôm ‘măng pơ long teh sŏk iĕr SEA Games 31 đơ̆ng ‘năr 16 truh ‘năr 22/5. Tơ̆ Hải Dương, môn bóng bàn đei pơ gơ̆r tơ̆ Hnam pơ long Hải Dương đơ̆ng ‘năr 13 truh ‘năr 20/5. Dêh char hlôi hơ met ăn jên dang 10 ti pơm hơ met ming anih, tơ mam tơ̆ anih hnam pơ long. Tơ̆ dêh char Hòa Bình, tơ drong jang hơ met ăn pơ long hao gre tang vang SEA Games 31 đĭ hơ met tôm bơ̆ih. Mă loi ‘noh jĭ, tơ̆ Phú Thọ, Hnam pơ long dêh char hlôi hơ met ăn tơ drong pơ gơ̆r dôm ‘măng pơ long đă ƀŏng lŏng U23+3 SEA Games 31./.  

Thuem: Tơ blơ̆