30 sơnăm kơ âu, dôm bơngai jang ƀăo  VOV tơ̆ Tây Nguyên tơpă jing đe linh yuk hơlâu lơ̆m tơdrong jang đon kơchĕng joh ayŏ; jang tơnăp sơnong jang ƀăo chĭ kĕch mang: jing bơngai tơroi tơbăt gah trong tơchơ̆t jang đơ̆ng Đảng, tơchơ̆t đơ̆ng khôi luơ̆t teh đak. Tơroi tenh kuăng – hơdah, tơtom. Atŭm hăm noh tơhlâu tơpăt hăm dôm tơdrong pơm yoch glăi, tơhlâu rim tơdrong pơhlŭ pơm tơsŭl tơsăl tơdrong rơngei hiôk hian, tơgop kăp gĭt lơ̆m tơdrong jang hơtŏk tơ-iung kơ Tây Nguyên. Ƀok Điểu Dũng tơ̆ xah Dak Ndrung, apŭng Dak Song, dêh char Đăk Nông tơroi: “Tơdrong rapor nơ̆r M’nông 'noh 'lơ̆ng, kon pơlei lăp tơmơ̆ng. Tơdrong tơroi roi năr roi tơnăp, tơdrong tơroi gah choh jang xa pơtho ăn kon pơlei băt trong jang vei lăng 'long pơtăm. Tơroi gah tơchơ̆t jang đơ̆ng Đảng păng teh đak truh hăm kon pơlei. Inh hơpơi 'meh tơdrong tơroi nơ̆r M’nông pơtoi pơre nơ̆r gah dôm tơdrong tơroi pơtho akhan hơlêm kon sâu hơdrin hŏk pơhrăm, tơroi gah kih thuơ̆t pơtăm tiu, kaphê... kon pơlei tôch lăp tơmơ̆ng"

Yă Ka Lót (hơdrung K’Ho Mạ) oei tơ̆ tơring Lộc Bắc, apŭng Bảo Lâm, dêh char Lâm Đồng ‘noh mĭnh ‘nu bơngai ‘meh mơ̆ng Radiô Nơ̆r Pơma Việt Nam rapor nơ̆r K’Ho. Mơ̆ng rim tơdrong hơri hăm nơ̆r kon kông kơdih, yă Ka Lót măh chhưu lơ̆m jơhngơ̆m. Jĭ kang ƀô̆ bơ̆ jang tơ̆ tơring, yă ƀôh hơdăh tơdrong gĭt kăl kơ nơ̆r kon kông bơ̆n ưh khan lăp lơ̆m chă pơma dơnuh dih băl, mă lei lơ̆m tơdrong bơ̆ jang kơ ‘năr. Gơnơm hơnơ̆ng mơ̆ng tơdrong rapor nơ̆r K’Ho kơ radiô Nơ̆r Pơma Việt Nam kơna yă Ka Lót mă băt hlôh hloh dơ̆ng tơdrong oei sa joăt joe kơ hơdrĕch hơdrung kơdih: “Kơdih ba ‘meh vă mơ̆ng rim ƀai hơri Long, tơdrong hơdri kon kông bơ̆n, mălei kơdih ba chă pơma sa kơ huê̆ păng ưh kơbăt hơri ... ba tôch kơ ‘meh mơng radiô. Đảng, Teh đak hlôi lăng ba kơjăp truh hăm nơ̆r hơdrung K’Ho-Mạ rapor tơ̆ Radiô ĭnh chơt hơ iă dêh”

Ƀok Ha Hiếu (hơdrung K’Ho) bơ̆ jang tơ̆ Hơnih jang Jŏh ayŏ Kơtơ̆ng ang păng Đă ƀŏng lŏng tơplŏng kơdau apŭng Dăm Rông, dêh char Lâm Đồng tơbăt, mĭnh păh ƀok bơ̆ jang chih kơtơ̆ng ang hloi, jang hloi chih akŏm, tơblơ̆ nơ̆r păng pơre nơ̆r ăn tơdrong tơroi nơ̆r K’Ho. ‘Ngoăih bơ̆ jang kơtă, Radiô rapor-Pơdăh tivi apŭng oei hrip iŏk păng pơdăh dôm tơdrong kơtơ̆ng ang au ti kơ radiô Rapor-Pơdăh rup dêh char Lâm Đồng păng Tơdrong rapor nơ̆r K’Ho kơ Radiô Nơ̆r Pơma Việt Nam kơ yuơ hơnih bơ jang vei tơ̆ tơring Tây Nguyên bơ̆jang. Gơnơm đơ̆ng noh, kon pơlei bơngai K’Ho oei tơ̆ apŭng hơtăih yăih Dăm Rông mă băt lơ tơdrong păng ‘lơ̆ng hơ iă: “Sơ̆ inh bơ̆ jang lơ̆m hơnih jang nô̆i vŭ, đơ̆ng rŏng ‘noh ĭnh bơ̆ jang tơ̆ Hơnih bơ̆ jang vei lăng kon kông. Truh đĭ sơnăm 2018 đei pơjao ăn năm bơ̆ jang tơ̆ radiô Rapor-Pơdăh tivi Đam Rông. Tơdrong jang tơm kơ ĭnh ‘noh tơblơ̆ đơ̆ng nơ̆r Yuăn jing nơ̆r KơHo. Đơ̆ng rŏng ‘nŏh mă đŏk nơ̆r KơHo lơ̆m brŏ. Dôm tơdrong tơroi tơ̆ au đei ƀơm truh tơdrong choh jang sa, atŏk tơ iung mŭk drăm ŭnh hnam, găh tơdrong vei lăng năng tông cham char tơ̆ pơlei pơla, găh tơdrong hŏk pơhrăm kơ kôn mon kon sau lơ̆m tơring”.

30 sơnăm au ki, Rađiô nơ̆r pơma Việt Nam - Hơnih bơ̆ jang oei tơ̆ Tây Nguyên hlôi hơdrin vă jang keh đang dôm tơdrong jang đei pơjao. ‘Moi kiơ̆ tơdrong tơroi tơbăt, pơrô̆ pơrôp tôm tong, tơtom lang să, trŏ lăp hăm rim tơdrng pơgơ̆r chinh trĭ, mŭk drăm tơpôl, sơđơ̆ng teh đak đei ƀôh lơ̆m tơring ăn kơ bôl boăl chă mơ̆ng, chă đŏk lơ̆m teh đak păng teh đak đe. Rađiô nơ̆r pơma Việt Nam - Hơnih bơ̆ jang oei tơ̆ Tây Nguyên hlôi tơgop kơtang ăn tơdrong atŏk kơtang iŏk đei jơnei ăn tơdrong tơ iung pơjing tơpôl tơgoăt tơgoăl pôm nơ̆r ƀơ̆r đon kon pơlei pơla, ăn tơdrong atŏk tơ-iung kơtang kơ tơring Tây Nguyên.