Tơdrong đei măt đơ̆ng Radio nơ̆r pơma Việt Nam tơ̆ anih ming tơƀôh lơ̆m Năr Hla ar tơroi lơ̆m tĕh đak sơnăm 2023 hăm hơnăn tôm tĕch, tôm tơ̆l: “Lơ kơmăy roi tơbăt – Lơ nơ̆r pơma – Gơ̆h hơgei – ‘Lơ̆ng hơiă” hlôi sơng đei lơ bơngai truh lăng.  Lơ bơngai truh lăng ƀât anih ming tơƀôh đơ̆ng Radio nơ̆r pơma Việt Nam chă phĭn ngôi rup hăm logo VOV tôch juăt păng mơ̆ng lơ nơ̆r roi tơbăt, lăng ngôi bơ̆n um rup găh tơdrong jang tŏk đơ̆ng Radio.

Radio nơ̆r pơma Việt Nam jĭ anih chih hla ar tơroi đei lơ kơmăy kơmŏk roi tơbăt, đei hloi tivi, ƀăo in păng ƀăo điên tư, hăm khul bơngai jang chih tơdrong kơtơ̆ng ang, jang ki thuơ̆t văjê̆ truh 2700 ‘nu. Hăm lơ nơ̆r pơma đei 13 nơ̆r tĕh đak đe păng 13 nơ̆r kon kông lơ̆m tĕh đak, Radio hơnơ̆ng hơtŏk đon jang kiơ̆ kơmăy ‘nao, gơ̆h hơgei, ‘lơ̆ng hơiă vă pơm lăp hăm đĭ đăng bơngai mơ̆ng lăng.