Mih ma duch nă păng bôl boăl ‘nao mơ̆ng ƀai hơri Eirei yoa ƀok Y-Nguk Niê hơri. Ƀai hơri pơ ư kơ pơlei pơla ‘lơ̆ng rŏ, pơm ăn lơ bơngai mơ̆ng lăp đon, roi ‘mêm kơ tơdrong arih, tơtă ăn mih ma duch nă băt ‘mêm, vei lăng bri ‘long, vei lăng đak hơdrâm kơ pơlei. ‘Ngoăih kơ hơri pơ ư kơ pơlei pơla, tĕh đak, ƀok Y-Nguk Niê oei gơ̆h hơri pơyong druh dăm, hơri pơtho ăn kon sâu adrin hŏk pơhrăm vă ning mônh kơnh vang tơgop ăn tơdrong pơjing pơlei pơla pơdrŏ, ‘lơ̆ng rŏ.

Ƀok Y-Nguk Niê rơnĕh păng arih xa truh ‘lŏ lơ̆m 1 unh hnam đei mĕ ƀă, yă ƀok gơ̆h hơri ngăl. Đơ̆ng oei ‘lơ̆p, rơdơ̆ ƀơ̆r hơri pơlung, dăh mă djơ djrang ƀai hơri pơchơt đơ̆ng tơdrong hơri Rađe hlôi hrơm mât lơ̆m jơhngâm đon ƀok. Rim ‘măng kiơ̆ mĕ ƀă năm tơ̆ mir, hơnơ̆ng mơ̆ng ƀă chă hlôm ngôi đing buôt dăh mă đing năm kŭm hăm lơ boa hơri tôch hơiă nhen hiơt hiong đĭ tơdrong gleh hrat đơ̆ng jang mir hloi.

Ƀok Y-Nguk Niê tơroi, dôm ƀai hơri nhen pơlung jơhngâm, tưk tơiung tơdrong hưch hanh ăn ba păng kon sâu lơ̆m hnam, yoa kiơ̆ nơ̆r jô̆ pơđơ̆k đơ̆ng ƀơ̆r hơri sơ hơnhăk ba tơdrong chơt ăn ba, ăn kơtum kơtŏng ‘nhŏng ŏh, kiơ̆ đơ̆ng nŏh kŭm đei hloi nơ̆r pơtho tơƀôh, tơtă ăn kon mon athei kiơ̆ trong jang đơ̆ng Đảng, tĕh đak tơjur ăn: “Inh gơ̆h hơri Eirei, gơ̆h tôn chĭng. Mưh chă hơri ngôi ƀai hơri Rađe inh ƀôh tôch čhôk ‘nă. Ƀai hơri Rađe đei hơri Kưt, Eirei. ‘Nŏh jĭ dôm ƀai hơri pôk pơ ư Đảng, tĕh đak, ưh đei mơ̆ng nơ̆r lu bơngai kơnê̆ pơhlŭ vă phă ngơ̆r pơlei pơla, athei rim bơngai adrin jang xa, kon sâu adrin hŏk pơhrăm.”

Ưh lăp gơ̆h hơri lơ ƀai đĕch, ƀok Y-Nguk oei gơ̆h hlôm đing năm păng đei măt lơ̆m Khul tôn chĭng xăh Čư̆ M’Gar, apŭng Čư̆ M’Gar hai. Hăm jơhngâm đon hưch ‘mêm, ‘mĕh chĕp vei dôm tơdrong hơri tôch hơiă đơ̆ng yă ƀok sơ̆ ăn jơhnơr mơlôh, ƀok Y Nguk Niê kŭm hăm lơ bơngai gơ̆h hơri, hlôm đing năm, gơ̆h tôn chĭng lơ̆m pơlei hơnơ̆ng chă trong pơih lăm pơtho ăn kon sâu tơ̆ tơring.

Ƀok Y Nguk Niê tơroi dơ̆ng: “Nhôn kră bơih mă lei oei tơtăm lơ tơdrong. Đei lơ bơngai kră đĭ vih hăm yă ƀok sơ̆ bơih. Nhôn jĭ bơngai năm hơdrol kơna hơpơi ‘mĕh pơtho tơƀôh dơ̆ng ăn kon sâu. Hơri eirei dăh mă hơri kưt, tôn chĭng dăh mă dôm tơmam tôn rĕh nai. Ƀât rim jơ ngôi pơchơt, hơri hơxoang tơ̆ pơlei, tơ̆ xăh dăh mă đei tơdrong nê̆ năn kâu nhôn truh ngăl.”

Pơngơ̆t kơ tơdrong hơri hơxoang hơdrĕch kơdih hiơt hiong, hăm hơnăp jang pơm Ƀok pơgơ̆r plei Huk B hlŏh 25 sơnăm ‘nâu, ƀok Y Nguk Niê hơnơ̆ng tơmât hơdai tơdrong pơtho ăn kon pơlei băt ‘mêm tơdrong juăt ‘lơ̆ng đơ̆ng hơdrĕch kơdih kiơ̆ dôm ‘măng hŏk hôp pơlei. Mă lei vă jang đei dôm tơdrong ‘nŏh kơdih kâu kon pơlei athei akŏm jơhngâm, mĭnh ƀơ̆r đon vă jơva chĭng chêng, boa hơri Kưt, Eirei gơ̆h păr ang ling lang truh rim jơhnơr đơ̆ng rŏng.

Ƀok Y-Nguk Niê pơma dơ̆ng: “Hrei ‘nâu tĕh đak tôch tơrĕk vă mih ma duch nă bơ̆n chĕp vei chĭng chêng, hơri, nơ̆r jô̆ pơđơ̆k… đơ̆ng hơdrĕch bơ̆n. Tơdrong ‘nŏh ăn ƀôh tĕh đak hơnơ̆ng hue lăng truh tơ̆ kon pơlei bơ̆n. Ưh ăn hiơt hiong tơdrong juăt ‘lơ̆ng đơ̆ng bơngai Rađe bơ̆n. Bơ̆n athei pơtho dơ̆ng ăn kon sâu, mă loi ƀât ‘nao 7-8 sơđơ̆ng, hăm tơdrong pơtho đơ̆ng dôm bơngai kră nhen nhôn âu.”

Hơnơ̆ng chă trong chĕp vei păng tôch hưch ‘mêm, jang tôch tơnăp, ƀok Y-Nguk Niê tơ̆ plei Huk B, xăh Čư̆ M’Gar, apŭng Čư̆ M’Gar, dêh char Dak Lak rim năr oei hơnơ̆ng chă tơgŭm ăn kon pơlei băt ‘mêm dôm lơ boa hơri hiôk hơiă, jơva đing buôt dur hơbôn, jơva chĭng chêng djơ djrĭng tôn vang… Gơnơm ƀĕnh jơhngâm đon hưch ‘mêm tơdrong jŏh ayŏ kơ dŏ xoang ‘lơ̆ng hơiă kơ hơdrĕch kơdih nhen ƀok Y-Nguk Niê mă tơdrong jŏh ayŏ kơ dŏ xoang kăp gĭt đơ̆ng kon pơlei kon kông tơ̆ tơring oei hơnơ̆ng đei chĕp vei kơjăp.