Đơ̆ng sơnăm ou, Pơm lêh Sầu riêng Krông Pach gô đei hơtŏk kơtang jing Pơm lêh Sầu riêng dêh char Dak Lăk. Tơdrong mă ou hlôi đei Hơnih vei lăng kon pơlei dêh char Dak Lăk drơ̆ng mĭnh nơ̆r ‘moi kiơ̆ nơ̆r pơma pơtôch đơ̆ng Khul kơdră chĕp pơgơ̆r Đảng dêh char, lăp đơ̆ng rŏng lăng hơlen dôm tơdrong iŏk đei jơnei đơ̆ng rim ‘măng pơm lêh hơdrol ou ki. Kiơ̆ trong hle, Pơm lêh Sầu riêng dêh char Dak Lăk gô đei pơgơ̆r kiơ̆ jơ̆p lơ̆m dêh char, 2 sơnăm pơgơ̆r mĭnh ‘măng. Tơchĕng hơlou, Pơm lêh sầu riêng mă blŭng lơm dêh char gô đei pơgơ̆r lơ̆m sơnăm ou, ‘nou jĭ tơdrong pơgơ̆r kăl, tơklep dih băl ƀar păh choh jang sa, oei sa păng tơmang pơhiơ̆. Pơm lêh gô đei pơgơ̆r lơ tơdrong, nhen: jơnŭm kơchơ tơmam drăm choh jang sa, ‘măng pơlong plei ‘long ‘ngam, gre yak pơrŏ, joh ayŏ kơdŏ soang kră sơ̆, tơƀôh tơbăt tơmang pơhiơ̆, tơgoăt tĕch răt tơmam drăm choh jang sa…Kiơ̆ đơ̆ng Hơnih vei lăng Joh ayŏ kơdŏ soang, Đă ƀŏng lŏng tơplŏng kơdou păng Tơmang pơhiơ̆ dêh char Dak Lăk, dêh char tŏk bŏk tơ iung pơjing trong pơgơ̆r atŏk tơ iung hơdăh ăn Pơm lêh Sầu riêng, hăm pơjing kơnăl jĭ tơdrong tơm lơ̆m pơgơr tơmang pơhiơ̆ jăl 3 sơnăm ou, mă kăl ‘noh jơ ‘năr pơdơ̆h Pơm lêh Quốc khánh 2/9.