Tơdrong jang yua đơ̆ng Anih tơm vei lăng găh Kơmăy kơmŏk Mơdro sa jang hơdai hăm Anih tơm vei lăng găh Joh ayŏ, Tơplŏng kơdâu păng Tơmang lăng, Anih tơm vei lăng găh Choh jang sa păng Cham char, Anih vei lăng kon pơlei pơlei tơm Hà Nội, Anih vei lăng kon pơlei pơlei tơm Hồ Chí Minh, Grŭp jang Vingroup pơgơ̆r păng jing hơnih pơkă joh ayŏ ‘lơ̆ng hơiă mưh rim năr Tết truh, Pơyan Puih mak vih.

Hăm pơgơ̆r tih kơ teh đak, akŏm rơbâu anih jang, anih mơdro sa lơ̆m păng ‘ngoăih teh đak, Jơnŭm kơchơ đei hơnăp jang pơtrŭt răt yua lơ̆m teh đak, pôk pơ ư păng roi tơƀôh pran kơtang dôm tơmam Việt Nam ‘lơ̆ng. ‘Nâu jĭ hơdrin yan âu vă pơtrŭt trong jang kơjă “Pơm tơlĕch - Tĕch mơdro - Răt yua”, pơm đei 1 anih răt yua ‘lơ̆ng hơiă, pơm lăp hăm ‘meh vă đơ̆ng kon pơlei lơ̆m dôm năr vă jê̆ Tết. Jơnŭm kơchơ đei pơm hăm să dang 3.000 kơdeng tơmam răt yua hơdai hăm dôm hơnih pơvih ăn joh ayŏ, tơmam sa păng chă lăng vă kơbăt.