Ah tong hơnê̆ khei 1 ou ki, Hơnih jang vei lăng kon pơlei phương Ea Kao, dêh char Đăk Lăk pơgơ̆r tơdrong pơdah livestream hăm hơnăn “Pơlei Tơng Jŭ, Ea Kao hmach kơ kuh”, đei pơih kơtă lơ̆m mạng tơpôl nhen Facebook, Zalo OA, TikTok. Lơ̆m hloh minh jơ, cham char, hơnih akŏm joh ayŏ păng tơdrong hơrih pơm jang kơ bơngai ÊĐê đei tơbang kơtă truh lơ bơngai lăng.

Kiơ̆ kơ ƀok Trần Công Hữu, Phŏ Kơdră Hơnih jang vei lăng kon pơlei phương Ea Kao, trong jang ou ưh hơdrô̆ pơm hơdah Tơchơ̆t 57 mă oei pơm trong tơplih lơ̆m đon tơchĕng tơbang păng tĕch tơmam drăm kơ tơring: “Tơdrong pơdah livestream jĭ trong 'nhăk hơp tak xah tanh brai Tơng Bông pơma hơdrô̆ păng dôm hơnih jang mŭk drăm lơ̆m phương pơma atŭm vă hơtŏk mŭk drăm kơsô̆ lơ̆m khei năr truh. Tơdrong pơdah ưh hơdrô̆ tơbang dôm kơjă juăt jue, hơnih akŏm pơm jang kơ bơngai ÊĐê mă oei tơgop hơtŏk tơdrong tĕch tơmam drăm kơ tơring, tơguăt hơtŏk mŭk drăm hăm tơdrong jang vei răk tơƀăk mong um ai joh ayŏ. Kiơ̆ đơ̆ng tơdrong pơdah live stream ou, nhôn hơpơi 'meh pơtruh dôm tơdrong hơlen băt tơguăt 'lơ̆ng hloh”.

Atŭm hăm tơmam drăm tanh đei, tơdrong pơdah livestream oei tơbang tơmam xa juăt jue păng tơdrong jang tơmang pơhiơ̆ kơ pơlei pơla Tơng Jŭ. Hăm trong pơm jang ou, tơmoi gơh chă tơmang lăng pơlei pơla, hơlen băt gah tơdrong jang juăt jue, chă xa por 'nhot kon kông, hơlen băt gah tơdrong hơrih oei xa hơdoi hăm kon pơlei.

Yă H'Yam B.Krông, kơdră khul jang tơmang pơhiơ̆ pơlei pơla Tơng Jŭ, phương Ea Kao, dêh char Đăk Lăk tơroi: “Vang jang tơmang pơhiơ̆ kon pơlei gơh jang lơ tơdrong, pơtih nhen pơtăm 'nhot, rong kon tơrong, choh pơtăm, dôm tơmam drăm mă kon pơlei pơm tơlĕch đei tĕch tơ̆ tơring po hơrih xa, noh jĭ tơdrong sô̆ hơ-iă hloh. Noh ah mă tơmang pơhiơ̆ hơtŏk tơ-iung tơ̆ tơring teh kơ phương Ea Kao 'noh kơdih inh atŭm hăm kon pơlei chơt hơ-iă dêh, vă đei trong jang hơtŏk tơdrong hơrih rim năr kơ po roi năr roi tơnŏ hloh. Atŭm hăm noh jing atŭm vei răk tơƀăk mong joh ayŏ kơ tơring”.

Atŭm hăm dôm tơdrong tơlĕch jang tơ̆ tơring, tơplih kơmăi kơsô̆ gah tơdrong jang joh ayŏ tŏk bŏk đei dêh char Đăk Lăk pơm jang drơ̆ng minh. Tơ̆ Hơnih Tơƀôh pơdă Đăk Lăk, Phŏ Kơdră Trần Quang Năm ăn tơbăt, tơdrong iŏk yua kŏng ngê̆ sô̆ hlôi jang tơnăp lơ̆m tơdong akŏm, klah asong păng rơih dôm tơmam drăm, hla bar chih kăl ăn tơdrong pơdah. Atŭm hăm noh tơgop hơtŏk tơdrong 'lơ̆ng 'măn ăn tơmoi chă tơmang lăng: “Hơnih tơƀôh pơdă hlôi tơmơ̆t lơ̆m kơmăi kơsô̆ tơmam drăm, khôi juăt, tơdrong et xa juăt jue kơ kon pơlei kon kông lơ̆m dêh char. Iŏk yua dôm kơmăi kơmŏk AR, VR vă gơh đei tơdrong pơma dơnuh, hơlen băt đơ̆ng tơmoi hăm dôm kơjă mŭk drăm joh ayŏ juăt jue kơ dêh char Đăk Lăk”.

Truh dang ei, hơnih chih akŏm yư lĭu sô̆ 'măn pơre nơ̆r kơdih hlôi đei pơtơm tơ̆ 3 hơnih gru grua kơ jơhnơr hơrih teh đak pơkăp tơ̆ dêh char Đăk Lăk, noh Hnam phak Buôn Ma Thuột, Hnam ƀok pơtao Bảo Đại păng Đình Lạc Giao. Kơmăi kơmŏk tơroi tơbăt adoi đei yua nhen minh tơmam drăm tơm hloh lơ̆m chă tơbang joh ayŏ tơguăt hăm tơmang pơhiơ̆. Tơdrong tơm tơroi tơbăt đei chih akŏm lơ̆m kơmăi kơmŏk kơsô̆, tơgŭm pơih să tơdrong hơlen băt đơ̆ng tơpôl. Ƀok Trần Hồng Tiến, Kơdră Hơnih jang Joh ayŏ, Tơplŏng kơdou păng Tơmang pơhiơ̆ dêh char Đăk Lăk ăn tơbăt: “Nhôn hlôi pơih lơ lăm pơhrăm, iŏk yua kơmăi kơmŏk 'nao ăn kang ƀô̆ bơngai jang lơ̆m tôm hơnih jang adoi nhen ăn kang ƀô̆ bơngai jang kơ hơnih jang joh ayŏ tơpôl kơ rim xah, phương. Jang atŭm hăm rim hơnih jang mŭk drăm gah kơmăi kơmŏk 'nao, chih akŏm tơdrong jang, tơlĕch minh ƀar tơdrong jang tơrĕk truh tơplih kơmăi kơsô̆ kơ hơnih jang, nhen iŏk yua tơplih kơmăi kơsô̆ gah mŭk drăm joh ayŏ, tơmang pơhiơ̆, tơplŏng kơdou adoi nhen lơ̆m dôm tơdrong jang kăp gĭt nai”.

Tơplih kơmăi kơsô̆ tŏk bŏk oei pơjing cham char vă joh ayŏ bang hơdah hloh lơ̆m tơdrong hơrih rim năr tơ̆ Đăk Lăk. Kiơ̆ đơ̆ng noh tơgop pơlan să kơjă joh ayŏ, pơih să trong hiôk vă hơtŏk tơ-iung pơm trong jang xa ăn kon pơlei păng sơkơ̆t hơdah trong yak kơjăp sơđơ̆ng ăn tơdrong jang tơmang pơhiơ̆ tơ̆ tơring lơ̆m chăl sơnăm tơlĕch jang 'nao.