Tơchơ̆t kơsô̆ 80-NQ/TW đơ̆ng Hơnih tơm Chinh trĭ jăl 13 gah hơtŏk joh ayŏ Việt Nam đei tơbang lơ̆m 'măng Hop akŏm Đảng mă 14 tơƀôh tơdrong pơkăp tih đơ̆ng Đảng lơ̆m tơdrong pơklaih tơhlăk tơhlĭn gah tơchơ̆t jang, jơhngơ̆m pran akŏm đơ̆ng tơdrong joh ayŏ, pơjing jơhngơ̆m pran 'nao, hơtŏk tơdrong tơ-iung tenh, kơjăp sơđơ̆ng kơ teh đak lơ̆m anglŏ sơnăm 'nao.

Tơchơ̆t ră hơdah sơnong kơ mŭk drăm joh ayŏ nhen mŭk drăm dơnơm vă pơjing joh ayŏ gơh hơgei, akŏm ƀenh um ai joh ayŏ kon pơlei lơ̆m chăl 'nao. Tơchơ̆t iŏk mŭk drăm joh ayŏ đei mŭk tơmam păng đon bơnôh jing minh lơ̆m dôm mŭk drăm joh ayŏ kăp gĭt kăl đei iŏk yua vă hơtŏk tơ-iung kơjăp sơđơ̆ng. Lơ̆m Tơchơ̆t ou, tơdrong vei răk păng iŏk yua mŭk drăm ưh hơdrô̆ jing sơnong jang vei răk juăt jue mă hlôi đei akŏm lơ̆m minh trong jang hơtŏk tơ-iung tôm tơdrong, kơjăp tơguăt hăm pơtho pơhrăm, tơpôl, mŭk drăm, mă kăl noh lơ̆m khei năr jang hơdaoi lơ̆m apŭng plenh teh păng tơplih kơmăi kơsô̆.

Dôm hơdrung bơngai Bru – Vân Kiều, Chứt hơrih xa đunh đai tơ̆ dêh char Quảng Bình hơdrol ki, dang ei noh dêh char Quảng Trị. Tơ̆ ou đei lơ mŭk drăm joh ayŏ tơguăt hăm bri kông Trường Sơn, đak krong đak glung păng akŏm tơpôl pơlei pơla. Tơdrong vei răk mŭk drăm ưh gơh tơklah hăm tơdrong vei răk joh ayŏ pơlei pơla, vei lăng bri, thong đak păng trong jang xa juăt jue. Đon pơkăp đơ̆ng Tơchơ̆t kơsô̆ 80 NQ/TW đơ̆ng Hơnih tơm Chinh trĭ sơkơ̆t hơdah vei răk joh ayŏ lơ̆m tơdrong tơguăt kăp gĭt hăm cham char păng hơtŏk tơ-iung sơđơ̆ng.

Ngê̆ nhơ̆n Đinh Văn Chờ, hơdrung bơngai Chứt tơ̆ pơlei Hóa Lương, xah Kim Điền, dêh char Quảng Trị akhan, tơlĕch jang kăp gĭt đơ̆ng Tơchơ̆t noh iŏk kon bơngai pơm tơm, lơ̆m noh kon pơlei pơla jing tơ-'ngla gơh pơjing păng vei răk mŭk drăm. Ƀok Đinh Văn Chờ tơroi: “Joh ayŏ jing tơdrong tơm kơ đont ơchĕng, tơdrong hơtŏk tơ-iung kơ tơpôl. Đei Đảng păng Teh đak tơrĕk tơgŭm, kon pơlei Chứt nhôn sô̆ hơ-iă dêh, kăp gĭt tơpă vă hơ tŏk iŏk yua, đei gơh vei răk kơjă joh ayŏ kơ bơngai Chứt. Đơ̆ng tơring truh Trung ương pơm thoi yơ hơnơ̆ng tơrĕk truh dôm mŭk drăm kơ kon pơlei kuă kơ hăp hiơt hiong, kăl đei tơchơ̆t jang trŏ ƀlep, đei tơdrong pơdjoi, pơtho ăn kôn mon kon sou vă vei răk păng hơtŏk mŭk drăm”.

Hơlen lăng tơ̆ Đăk Lăk, lơ̆m tơdrong jang Vei răk păng tơƀăk mong mŭk drăm joh ayŏ kăp gĭt kơ teh đak lơ̆m dêh char đơ̆ng sơnăm 2023 – 2025 hlôi tơlĕch tơdrong jang hơdah vă vei răk, pơdjoi păng iŏk yua dôm kơjă kăp gĭt kơ 3 mŭk drăm joh ayŏ kơ teh đak nhen: Khan (hơri hơ-'mon) kơ bơngai Êđê, Nơ̆r pơđơ̆k kơ bơngai Êđê păng Et soi kơ sơnăm hơrih kơ bơngai M’nông. Hơdah nhen pơih dôm lăm pơtho gah mŭk drăm joh ayŏ kăp gĭt kơ teh đak; chih akŏm dôm tơdrong pơkăp vă vei răk tơƀăk mong tơguăt hăm sơnong hơtŏk jang mŭk drăm – tơpôl kơ tơring; pơjing dôm tơdrong jang hơdah gah iŏk yua mŭk drăm joh ayŏ kơ teh đak tơguăt hăm tơmang pơhiơ̆ pơlei pơla, iŏk yua sơnong tơm kơ mŭk drăm kră sơ̆, hơnơ̆ng pơgơ̆r dôm tơdrong pơdah mŭk drăm joh ayŏ lơ̆m tơdrong hơrih pơlei pơla, lơ̆m dôm tơdrong akŏm tơmang pơhiơ̆ joh ayŏ... Đơ̆ng dôm tơdrong tơchơ̆t jang trŏ ƀlep ou hlôi tơgŭm kon pơlei đei xa yua păng vei răk đei joh ayŏ kăp gĭt tơ̆ tơring. Yă Hring Mlô, bơngai hơdrung Ê Đê, oei tơ̆ pơlei M’Găm, xah M’Drak, dêh char Đăk Lăk tơroi, gơnơm đei Đảng păng Teh đak, kon pơlei ưh hơdrô̆ klaih đơ̆ng hin dơnuh mă oei gơh vei răk tơƀăk mong tơdrong joh ayŏ kơdih po: “Hnam inh kơtă ah jih trong, đei hnam pơtăm dơ̆ng. Inh 'meh chă tĕch pơdro et xa, 'nhot xa kon pơlei Êđê nhen pai tơdrô ge atŭm hăm pơdah tôn chĭng chêng vă vei răk um ai joh ayŏ kon kông po kơdih. Hnam inh adoi đei na, đei mir tăp dăr hnam, inh adoi pơtăm lơ hơdrĕch 'long xa plei... ”

Dôm tơdrong tơchĕng 'nao lơ̆m Hla bar kăp gĭt tơbang ah Hop akŏm Đảng 'măng mă 14 noh vei răk tơƀăk mong joh ayŏ lơ̆m trong pơkăp hơtŏk tơ-iung pran kơtang, tôm tơdrong joh ayŏ păng kon bơngai Việt Nam. Hơtŏk joh ayŏ păng kon bơngai Việt Nam kiơ̆ tơchơ̆t Hop akŏm mă 14 kơ Đảng gô jing minh trong jang drơ̆ng minh, tơguăt tơnăp đơ̆ng vei răk juăt jue joh ayŏ păng yak truh hơtŏk tơ-iung gơh hơgei.

Hla bar kăp gĭt tơbang ah Hop akŏm 'măng mă 14 kơ Đảng adoi sơkơ̆t hơdah 12 tơchơ̆t jang tih; 6 sơnong jang dơnơm păng 3 tơdrong jang kơtang hloh. Tơdrong tơlĕch jang hlôi pơm hơdah dôm sơnong jang gơh tơlĕch jang hloi. Lơ̆m noh, tơchơ̆t gah joh ayŏ păng kon bơngai jing tơdrong dơnơm kơ tơpôl, jơhngơ̆m pran vă hơtŏk tơ-iung kơ teh đak. Ƀok Mai Xuân Thành, Phŏ Kơdră Hơnih Joh ayŏ, Tơplŏng kơdou păng Tơmang pơhiơ̆ dêh char Quảng Trị ăn tơbăt, tơdrong đei ƀôh tơ̆ rim tơring groi kông, vei răk mŭk drăm joh ayŏ kon pơlei kon kông hơdrô̆ kơjăp sơđơ̆ng ƀơ̆t tơguăt hăm trong pơvih jang xa sơđơ̆ng ăn kon pơlei: “Đei dôm tơchơ̆t gah tơgŭm ăn đe ngê̆ nhơ̆n lơ̆m tơdrong jang vei răk tơƀăk mong, pơtho adoi nhen iŏk yua dôm kơjă joh ayŏ lơ̆m tơring. Kăl tơgŭm vă hơtŏk tơdrong hơrih ăn đe ngê̆ nhơ̆n nhan lăp hloh, atŭm hăm Teh đak vei răk tơƀăk mong kơjă joh ayŏ. Pơm jang tơnăp dôm tơchơ̆t đơ̆ng Luơ̆t Mŭk drăm, vei sơđơ̆ng ăn tơring vei răk, tơƀăk mong dôm kơjă kơ mŭk drăm joh ayŏ đon bơnôh kiơ̆ trŏ tơchơ̆t đơ̆ng Luơ̆t Mŭk drăm joh ayŏ”.