Pơjou soi kơ yang Y Phi Mjâo, oei tơ̆ pơlei A1, xah Ea Sup, dêh char Đăk Lăk ăn tơbăt, kiơ̆ khôi kră sơ̆, đơ̆ng rŏng kơ kăt ƀa đang, rim bơngai lơ̆m pơlei atŭm pơgơ̆r et xa. Tơdrong et xa ou tơƀôh đon bơnôh hmach bơnê gah tơdrong jang đei yua lơ̆m minh sơnăm pơm jang, apinh đei minh sơnăm ‘nao sơđơ̆ng, pơyan jang xa đei yua, kon pơlei grăng pran, tơguăt tơguăl.

Lơ̆m đon tơchĕng kơ bơngai Jarai, đe yang hơpang hơnơ̆ng grasia păng pring vei kon pơlei, mă hăt noh yang đak, yang bri. Mă lơ khôi juăt so pă đei yua kiơ̆ khei năr, khôi soi tơbeh adoi oei đei vei răk nhen minh tơdrong pơtoi kon bơngai hăm groi teh, hăm bri, tơƀôh tơdrong pôk bơnê păng đon lui noh yang hơpang gô tơgŭm ăn pơlei pơla gơh sơđơ̆ng, pơyan jang xa đei yua lơ. Bơngai soi kơ yang Y Phi Mjâo tơroi: “Soi kơ yang pơlei vă apinh ăn pơlei pơla gơh sơđơ̆ng, grăng pran. Đơ̆ng rŏng soi kơ yang pơlei noh nhôn pơgơ̆r soi kơ yang đak, soi kơ yang Khẩu hó vă ăn kon tơrong nhen nhŭng, kơpô rơmo gơh chêk lar, tang găn pơrang jĭ, tơdrong et soi ou nhôn pơgơ̆r kiơ̆ bơngai Lào. Nhôn pơgơ̆r et soi kơ yang pơlei vă rim bơngai gơh sô̆ hơ-iă ‘nă hal”.

Hơdrol kơ soi tơbeh, kră pơlei gô pơgơ̆r hŏk hôp pơlei pơla vă asong tơdrong jang. Đe tơdăm grăng pran noh năm tơ̆ bri koh kram, ‘lao, pơ-o vă pơm gơ̆ng pơtăm. Gơ̆ng đei lăng nhen minh hơnih pơtoi hăm yang hơpang, tơgŭm kon pơlei tơjê̆ hloh hăm yang hơpang. Lơ̆m kơplah noh, đe drăkăn oei tơ̆ hnam peh ƀa, pai pơđih tơdrô păng hơmet dôm tơmam xa juăt jue. ‘Nhŏng Y Nô Ksơr, tơ̆ pơlei A1, xah Ea Sup, dêh char Đăk Lăk ăn tơbăt: “Blŭng sơnăm nhôn hơnơ̆ng pơgơ̆r soi kơ yang đak, yang kông, yang Khẩu hó. Ah năr 29 Têt, dang ah năr tơkuh sơnăm so hăm sơnăm ‘nao noh nhôn gô pơgơ̆r. Lơ̆m năr ou, tôm bơngai lơ̆m pơlei pơla vih akŏm, tơ̆ ou đei pơlei A1, A2 pơgơ̆r atŭm, rim sơnăm adoi thoi ăi ngăl”

Đơ̆ng rŏng soi kơ yang pơlei, kon pơlei lơ̆m pơlei pơtoi hơvơn bơngai soi kơ yang nai truh vă soi kơ yang đak. Tơdrong et soi đei pơgơ̆r tơ̆ hơdrơ̆m đak, hơnih tơguăt hăm tơdrong hơrih rim năr kơ kon pơlei. Lơ̆m tơdrong et soi ou gô chô̆ brai ah kŏng ti kră pơlei, minh khôi juăt kăp gĭt vă apinh đei tơdrong sơnêp sơnoi, vei lăng păng tơguăt kon pơlei pơla hăm dih băl.

Kiơ̆ kơ ƀok Y Duk Ksơr, oei tơ̆ pơlei B1, xah Ea Sup, dêh char Đăk Lăk, ou jĭ khôi juăt ưh gơh kơƀah lơ̆m tơdrong hơrih đon lui kơ bơngai Jarai, tơƀôh tơdrong tơguăt kăp gĭt hăm cham char, atŭm hăm noh tơbăt ăn kon sou băt tơgĭt hăm thong đak, groi teh păng bri kông: “Pơgơ̆r et soi kơ yang pơlei, apinh ăn ‘mi kial sơđơ̆ng ‘lơ̆ng, jang xa đei yua lơ, ƀa đei ƀenh pơk, mah sŏng mah xa, unh hnam grăng pran, pŭn ai prăt sơnăm, tơmam soi plang hơnơ̆ng noh kơpô. Oei et soi kơ yang đak noh soi hăm nhŭng, vă rim unh hnam adoi đei tơdrong hơrih phĭ tơtŏ, kon sou ƀenh ƀang, ưh đei bơngai pơngot rơvĕt. Vă hơmet ăn tơdrong soi plang noh đei yă kiơ ‘nhăk mă noh, đei bơngai ‘nhăk phe, bơngai ‘nhăk iĕr, bơngai ‘nhăk tơdrô, tôm kon pơlei atŭm băl truh akŏm et soi sơng sơnăm ‘nao, et soi pơyan jur jang ‘nao”

Et soi blŭng sơnăm kơ kon pơlei Jarai ưh hơdrô̆ jĭ đon lui kơ yang hơpang mă oei jing ‘măng vă rim bơngai lơ̆m pơlei tơƀơ̆p băl, tơguăt đon bơnôh pơlei pơla kueng ƀôt. Dôm khôi kră sơ̆ đei vei răk tơƀăk mong păng tơplih trŏ ƀlep, tơgŭm ăn kôn mon kon sou băt hơdah gah kơjă joh ayŏ juăt jue, atŭm hăm noh tơroh kon pơlei pơla lơ̆m tơdrong hơrih ‘nao.